М.ЧИНБИЛЭГ

“Polit.mn” сайт “Төрсөн өдөр” буландаа зургаадугаар сарын 20-нд төрсөн эрхмүүдийн нэг болох “Тэнгисийн эрэг дээрх 247” шоуны оролцогч, хүний их эмч, охидын харцыг булаагч Х.Төгөлдөр буюу Төөгөөг онцолж байна. Тэрээр 1996 оны энэ өдөр Улаанбаатар хотод төрсөн. 33-р сургууль болон АШИУҮС-ийн лицей сургуулийг төгсчээ. Морь, мотоциклийн хоббитой тэрээр олон ч шоу нэвтрүүлэгт оролцож, цуврал кинонуудад дүр бүтээсэн нэгэн юм. “Яаралтай тусламжийн тасгийнхан”, “Чи өөрөө хайр” кинонуудад гол болон туслах дүрийг бүтээж, “Намайг сонгооч”, “Тэнгисийн эрэг дээрх 247” гэх хосоо олох нэвтрүүлгүүдэд оролцсон. Гэвч түүний сэтгэлд хүрэх бүсгүй хараахан олдоогүй, харин энэ шоу-аас амьдралынхаа үнэтэй найзуудаа олж чадлаа хэмээн онцолсон билээ. Эрүүл мэнд болон урлагийн салбарт хүч үзэж буй ч загварын салбарт ч мөн шуугиулж эхлээд байгаа билээ. Дотоодын “Gobi”, ”Khiilen” брэндийн нүүр царай болж, дэлхийн том брэндүүд болох “Lacoste”, ”Sprit”-тэй ч хамтарч ажиллаж байгаа юм. Эзэмшсэн мэргэжлийн дагуу эрүүл мэндийн зөвлөгөөг “tugu_kh” инстаграмм хаягдаа рийл хэлбэрээр нийтэлдэг. Түүний инстаграм хаяг 66.7 мянган дагагчтай. Олон төрлийн авьяастай, охид бүсгүйчүүдийн “краш” залуу Х.Төгөлдөр танд төрсөн өдрийн мэнд хүргэе.

Эх сурвалж: www.polit.mn