Ц.НОРОВЖАМБАЛ
“Polit” хуанли: “Төрсөн өдөр” буландаа хоёрдугаар сарын 25-нд төрсөн өдөр нь тохиож буй хүний эрхийн төлөө тэмцэгч, Монголын Өмгөөлөгчдийн Холбооны Удирдах зөвлөлийн гишүүн, өмгөөлөгч Ринзааны Булгамааг онцолж байна.
Р.Булгамаагийн хуулийн мэргэжил эзэмшсэн гол шалтгаан нь түүний аавынх нь үйл хэрэгтэй салшгүй холбоотой. Түүний аав Монгол Улсын гавьяат хуульч Ё.Ринзаан гэдэг хүн бий. Увс аймгийн Хяргас сумын харьяат нэгэн бөгөөд, бүхий л амьдралаа хууль эрх зүйн салбарт, шударга ёсны үйл хэргийн төлөө зориулсан нэгэн. Энэхүү үйл хэргийнхээ үргэлжлэл болгож, өөрийн охиныг энэ салбарын хүн болгож, хүний төлөө ёс зүйтэй сайн ажиллах арга барилыг олгож, зааж зөвлөдөг гэхэд болно.
Р.Булгамаа ахлах ангидаа орсон жилээ аавынхаа мэргэжлийг өвлөж, хуульч болохоор шийдсэн гэдэг. Хүний эрх, нийгмийн сайн сайхны хүчтэй дуу хоолой болж чаддаг тэрбээр нэгэн ярилцлагадаа “Миний ажил нийгмийн сайн сайхны төлөө гэсэн зарчимтай" гэжээ.
Тэрбээр хүүхэд хүчирхийлэл,эмэгтэйчүүдийн эрхийн талаар тууштай тэмцэж энэ чиглэлийн олон хуулийн төсөлд нэмэлт, өөрчлөлт оруулахад мэргэжлийн ур чадвараа зориулан ажилласан. Тиймдээ ч 2019 оны Монгол Улсын шилдэг про боно хуульчаар шалгарч байсан удаатай.
Улс төрийн карьерын хувьд УИХ-ын сонгуульд хэд хэдэн удаа дараа нэр дэвшин өрсөлдөж байв. Хууль зүйн салбарт түүн шиг мэдлэг чадвартай эмэгтэй хуульч тун цөөн гэдэгтэй олон нийт санал нийлнэ. Монголын өнөө цагийн хууль эрх зүйн салбарын өнгийг тодорхойлогч эмэгтэй танд төрсөн өдрийн мэнд хүргэе.
Эх сурвалж: www.polit.mn