Б.НЯМСҮРЭН

 “Polit” хуанли: “Төрсөн өдөр” буландаа орчин үеийн бизнесийн болон технологийн салбарт домог болон үлдсэн “Apple” брэндийн үүсгэн байгуулагч Стив Жобсийг онцолж байна.

Үргэлж хар өнгийн нэг загварын цамц өмсдөг, жил бүр шинэ технологийн нээлтээрээ дэлхий нийтийг алмайруулан сэтгэлд хоногшин үлдсэн энэ эрхэм хэдий богинохон насалсан ч дэлхий даяар олон сая хүний зүрх сэтгэлд гайхалтай урам зориг үлдээж чадсан билээ.

Стив Жобс 1955 оны хоёрдугаар сарын 24-нд АНУ-ын Калифорни мужийн Сан Франциско хотноо мэндэлжээ.

Дэлхийн түүхэнд бичигдсэн шинийг санаачлагч амжилтын эзний хүүхэд нас тийм ч дардан байгаагүй. Төрүүлсэн ээж нь амьдралын боломжгүйн улмаас хүүгээ үрчлүүлсэн бөгөөд өргөж авсан аав, ээж нь Стивийг чадлынхаа хэрээр боловсролтой болгоход анхаарчээ. Багадаа маш сэргэлэн, цовоо хүүхэд байсан ч үргэлж сургууль дээрээ дээрхлүүлж, дарамтлуулдаг байсан бөгөөд сургуульд явах хүсэлгүй, ганцаардмал хүүхэд байсан тухайгаа дурссан байдаг. Ахлах сургуулиа төгссөний дараа тэр Портлэнд хотын Рид коллежид элсэн орсон ч ганцхан улирал суусныхаа дараа сургуулиас гарах шийдвэр гаргажээ. Хожим үүнийгээ хамгийн зөв шийдвэр байсан хэмээн ярьсан байдаг.

Сургуулиасаа гараад амьдрахын тулд кока коланы сав цуглуулан зарж мөнгө олж байсан үе ч түүнд бий. Энэ хүнд үеэсээ гарахын тулд Энэтхэг рүү шинэ санаа эрэлхийлэхийн хажуугаар бясалгал хийж, оюун санаагаа зөв удирдах урлагт суралцсан гэдэг.

Аяллаасаа асар их урам зориг авсан тэрбээр хожмоо дэлхийд тэргүүлэх компьютер технологийн компанийнхаа эхлэлийг байшингийн гаражид тавьж байсан түүхтэй. Анхны компьютерээ "Apple 1" нэртэйгээр 1976 онд танилцуулж байсан "Apple" компани 10 жилийн дотор тогтвортой, алдар нэртэй салбартаа хэдий нь гол тоглогч болон танигдаж чадав.  Ингээд бидний сайн мэдэх iMac –ийн анхны хувилбарыг 1984 онд “MacinTosh” нэрээр танилцуулжээ. Гэвч дэлгэцийн суурин компьютер нь гарсан даруйдаа төсөөлж байсан шиг амжилт олсонгүй. Үүсгэн байгуулагчдын маргаан, Төлөөлөн удирлах зөвлөлийн шийдвэрээр Стив Жобс анхны үүсгэн байгуулалцсан компаниасаа хөөгдсөн нь 1985 он байлаа. Гэвч Стивийг эзгүйд “Apple” улам бүр дампуурал руу дөхсөөр байхад эсрэг талд Стив “Pixar” "NeXt" гэсэн хоёр ч компанийг байгуулан амжилттай авч явж байлаа. Одоо ч “Pixar” дэлхийн хамгийн шилдэг анимэйшн компанийн тоонд зүй ёсоор бичигддэг. 1997 онд Стив Жобс “Apple”-д эргэн ирж “Macintosh” компьютероо шинэчлэн танилцуулснаар компанийг буцаан хөл дээр нь тогтоосон байдаг.

Харин хүүхэд гэлтгүй томчууд ч хэрэглэхэд тохиромжтой Ipad нэртэй авсаархан, дэлгэц бүхий таблетийг анхлан танилцуулсан нь компанийг санхүүгийн хувьд бүрэн оршин тогтнох, ашиг орлоготой болох эхлэлийг тавьсан бөгөөд цааш цаашдаа гаргасан бүтээгдэхүүн бүр нь амжилт олсоор “Apple” дэлхийн хамгийн анхны их наядын үнэлгээтэй компани болов. 

 Түүний амжилт дэлхий нийтэд урам зориг өгсөнтэй адил эдгэрэшгүй хүнд өвчин нь ч сая сая хүний сэтгэл зүрхийг шархлуулах хүнд мэдээ байлаа. Хоёрхон жилийн дотор нүд нь ширгэж, турж эцсэн дэлхийн тэрбумтныг олон сая хүн өрөвдөн хайрласаар байв. Харамсалтай нь 2011 оны тавдугаар сард тэрбээр нойр булчирхайн хорт хавдрын улмаас хорвоог орхисон түүхтэй. Одоо ч түүний хэлсэн “Бүх зүйл өөрийн цаг хугацаатай” гэсэн үг дэлхийн сая сая залуучуудад урам зориг нэмэхийн зэрэгцээ өөрийн цаг хугацаагаа үлдээгээд одсон түүнийг дурсах нэгэн шалтгаан болсон хэвээр.

Эх сурвалж: www.polit.mn