Б.САНСАР

Польшийн Домброва Гурнича хотод Вацлав Циолковскийн нэрэмжит “Poland Open” олон улсын тэмцээн хоёр өдөр үргэлжлэн дүнгээ гаргажээ. Нэр хүнд бүхий энэ тэмцээнд 23 орны 150 эрэгтэй, 80 гаруй эмэгтэй бөх өрсөлдсөн юм. Тэмцээний эхний өдөр манай таван эмэгтэй бөх барилдсанаас 55 кг-ын жинд С.Бямбацэрэн, 60 кг-ын жинд С.Цэрэнчимэд нар тус бүр алт, 60 кг-ын жинд П.Орхон хүрэл медаль хүртжээ.

Харин удаахь өдөр манай зургаан эмэгтэй дэвжээнд гарч хүч үзсэнээс 63 кг-ын жинд гавьяат тамирчин С.Батцэцэг алт, 53 кг-ын жинд олон улсын хэмжээний мастер Э.Сумьяа мөнгө, 53 кг-ын жинд олон улсын хэмжээний мастер Э.Даваачимэг, 75 кг-ын жинд гавьяат тамирчин О.Бурмаа нар хүрэл медаль авлаа.

“Poland Open” тэмцээнд манай улсын эмэгтэйчүүдийн шигшээ баг 11 тамирчны бүрэлдэхүүнтэй оролцон ийнхүү гурван алт, нэг мөнгө, гурван хүрэл, нийт долоон медаль хүртэн эх орондоо ганзага дүүрэн ирэх нь.

Энэ удаа манай тамирчид ирэх сард болох ДАШТ-д оролцох Беларусь, Казахстан, ОХУ, Польш, Унгарын хүчтэй бөхчүүдтэй барилдан арга барилтай нь танилцсаны дээр БНСУ-ын Инчон хотод болох Азийн наадамд оролцохын өмнө энэ тэмцээн манай бөхчүүдийн хувьд том сорилго болсон байна.