Б.ДОЛЖИНЖАВ

Канадын дуучин Жастин Бибер, түүний найз бүсгүй Хейли Бибер болон Америкийн дуучин, жүжигчин Селена Гомез гурвын хамтдаа авахуулсан зураг олны анхаарлыг ихээр татаж байна. Үүнтэй холбогдуулан Америкийн загвар өмсөгч Хейли Биберийг “Амжилтын түүх” буландаа онцоллоо.

Жүжигчин аав, дизайнер ээжийн охин

Дэлхийн алдарт загвар өмсөгч Хейли Бибер 1996 оны арваннэгдүгээр сарын 22-нд Аризона мужид төржээ. Түүний аав нь Америкийн жүжигчин, найруулагч, продюсер Стефен Болдвин, ээж нь график дизайнер Кення Деодата Болдвин юм. Жүжигчин Стефен Болдвинийг “Born on the Fourth of July”, “Posse”, “8 Seconds”, “Threesome”, “The Usual Suspects”, “Bio-Dome and The Flintstones in Viva Rock Vegas” гэсэн кинонд тоглосноор нь үзэгчид мэдэх билээ. Хейли Биберийн ээж нь Итали, Португал гаралтай Бразил хүн. Өвөө нь Бразилийн хөгжимчин.

Хейли Биберийг Guess, Ralph Lauren болон Tommy Hilfiger гэсэн томоохон брэндийн нүүр царай гэдгээр нь олон нийт илүүтэй танина. Тэрбээр 2015 оны нэгдүгээр сард “Vogue” сэтгүүлд, гуравдугаар сард “Teen Vogue” сэтгүүлийн нүүрэн дээр гарч олон нийтийн анхаарлын төвд орж эхэлсэн байдаг. Үүнээс хойш Италийн Милан хот, Парис, Австрали, Франц улсын загварын долоо хоногийн шоунуудад оролцож дэлхийд алдартай загвар өмсөгч болсон билээ.

Дэлгэцийн бүтээлүүдэд дүрээ мөнхөлсөн нь

Тэрбээр есөн настай байхдаа гэр бүлийнхнийхээ тухай баримтат кинонд анх тоглосон түүхтэй. Харин Австралийн дуучин Коди Симпсоны "On My Mind" дууны клипэнд дурлалт бүсгүйн дүрийг анх 2011 онд бүтээж байв. Үүнээс таван жилийн дараа 2016 онд Францын загвар өмсөгч, дуучин Баптисте Гиабиконын "Love to Love You Baby" дууны клипэнд хоёр удаагаа тоглосон юм.

Мөн тэрбээр Италийн Милан хотын  MTV Europe Music Awards дуу хөгжмийн нэвтрүүлгийн хөтлөгчөөр 2015 онд ажиллаж байсан. Дараа нь 2017 оноос реппер “Method Man”-тай хамтран “Drop the Mic” шоуг хөтөлж эхэлсэн билээ. Хоёр улирлаар нэвтрүүлдэг энэ шоу нэвтрүүлэг одоогоор  түр цуцлагдаад байгаа юм:

Хувийн бизнесээ үүсгэв

Хейли Бибер өөрийн нэрийн бүтээгдэхүүн гаргах бараа бүтээгдэхүүний тэмдэгт авах зөвшөөрлөө 2018 онд авч, “Rhode” нэртэй арьс арчилгааны брэндээ энэ оны зургадугаар сарын 15-нд зах зээлд гаргаад байна. Тэрбээр хүүхэд байхдаа гэр сургуулиар хүмүүжжээ. Өсвөр наснаасаа Нью Йорк хот дахь Америкийн баллетын театртай холбогджээ. Уг нь Хейли Бибер мэргэжлийн балетын бүжигчин болохоор кареериэ эхлүүлж байсан ч хөлний бэртлийн улмаас энэ мөрөөдлөө орхижээ. Гэмтэхээсээ өмнө Майми хотын театрт балетын тоглолтод оролцож амжсан байна. Хейли Бибер Англиас гадна Португал хэлээр ярьдаг.

Хайрын романс

Хейли Бибер Канадын дуучин Жастин Бибертэй 2018 оны зургадугаар сард сүй тавьж, мөн оныхоо арваннэгдүгээр сард гэрлэлтээ батлуулсан юм. Тэд хоёр дахь хуримын ёслолоо  Өмнөд Каролина мужид 2019 оны есдүгээр сарын 30-нд хийсэн билээ. Хосууд хамтдаа христийн сүмийн цуглаанд оролцдог.

Эх сурвалж:www.polit.mn