Б.ДАРЬСҮРЭН

ШӨХТГ-ын зургадугаар хуралдаан өнөөдөр /2022.10.21/ болж “Улаанбаатар төмөр зам” ХНН-ийн 2022 оны наймдугаар сарын 29-ний 11/2796 дугаартай албан бичгээр ирүүлсэн зарим ачаа тээврийн бүлэг болон зорчигч тээврийн үнэ, тарифыг индексжүүлэх талаар “Зөвшөөрөл хүсэх” тухай хүсэлтийг хэлэлцлээ. ШӨХТГ-аас судалгаа хийхдээ үнэ тарифын индексжүүлэлт хийх тээврийн бүлгүүдийн хувьд Зам, тээврийн хөгжлийн яам, Сангийн яам, Уул уурхай, хүнд үйлдвэрийн яамнаас холбогдох санал авч хийж гүйцэтгэжээ.

Хуралдаанаар экспортын зэс, цайрын баяжмалын тээвэрлэлтийн үнийг 20, экспортын төмрийн хүдрийн тээвэрлэлтийн үнийг 15, экспортын жонш тээвэрлэлтийн үнийг 15, экспортын нүүрсний тээвэрлэлтийн үнийг 20, орон нутгийн болон олон улсын зорчигч тээвэрлэлтийн үнийг тус бүр 50 хувиар индексжүүлэхийг дэмжжээ. Ингэснээр “Зарим бүлгийн ачаа тээвэр болон зорчигч тээврийн үнийн өөрчлөлтийг зөвшөөрөх тухай” тогтоолын дагуу индексжүүлэн, ирэх сарын 1-нээс өөрчлөлт оруулахыг зөвшөөрсөн тогтоол гаргасан аж.

Мөн “Улаанбаатар төмөр зам” ХНН-д дээрх үнэ тарифын индексжүүлэлт хийснээр хэрэглэгчдийн эрх ашгийг хамгаалж, үйлчилгээний чанар стандартыг сайжруулах, ашиглалтын хугацаа дууссан ачааны болон зорчигч тээврийн вагоныг солих, зорчигчийн аюулгүй байдлыг хангаж ажиллах чиглэл хүргүүлжээ.

Зорчигч тээврийн тарифт 2017 оноос хойш индексжүүлэлт хийгээгүй бөгөөд одоогийн мөрдөгдөж буй тарифаар орон нутгийн зорчигч тээврийн нийтийн вагон УБ-Дархан чиглэлд 6000 төгрөг байдаг бол уг чиглэл дэх том оврын автобус 20600, суудлын автомашин (такси) 31000 төгрөгийн үнэтэй байна. Хуралдаанаас гаргасан шийдвэрийн дагуу үнэ тарифын индексжүүлэлт хийснээр дээрх чиглэлд иргэдэд үйлчлэх үнэ тариф 9000 төгрөг болох юм.

Эх сурвалж: www.polit.mn