Б.ОД

Монголын ашигт малтмал баяжуулагчдын холбооноос “Эрдэс боловсруулалт-2022” олон улсын онол практикийн бага хурлыг өнөөдөр зохион байгуулж байна. 

Өнөөдрийн байдлаар манай улсад 120 гаруй баяжуулах үйлдвэр үйл ажиллагаа явуулах эрхтэй. Гэхдээ тодорхой шалтгааны улмаас зарим үйлдвэр ажиллахгүй байгаа учир дотоодын баяжуулах үйлдвэрүүд 50 гаруй хувьтай үйл ажиллагаа явуулж байна.

Энэ талаар УУХҮЯ-ны Уул уурхайн бодлогын газрын мэргэжилтэн Н.Амартуул "Монгол Улсын хэмжээнд баяжуулах үйлдвэрүүд хангалттай бий. Хамгийн гол нь хүчин чадлаа бүрэн ашиглаж чадахгүй байна. Тиймээс ч хүчин чадлаа гүйцэд ашиглан эрдэс баялгийг баяжуулж, боловсруулан гаргахыг эрмэлзэх хэрэгтэй.Аж ахуйн нэгжүүд маань илүү дэвшилтэт технологи худалдан авах чиглэлд яриа хэлэлцээрээ сайжруулах нь чухал. Өөрөөр хэлбэл, сүүлийн үеийн технологиудыг илүү судалж, нэвтрүүлэх шаардлага байна гэсэн үг. Ялангуяа, жоншны баяжуулах үйлдвэрүүдийн технологи зарим талдаа хуучирсан нь ажиглагдаж байна. Байгаль орчин, хүний эрүүл мэндэд нөлөөлөл багатай технологи оруулж ирэх нь олон давуу талтай.Нэн тэргүүнд баяжуулах үйлдвэр нь байгаль орчинд, хүнд ээлтэй байх хэрэгтэй. Тиймээс ч технологиудын судалгааг хийж байгаа. Аль болох автомат буюу хүний оролцоо багатай байх, хамгийн өндөр бүтээмжтэй байх нь чухал байдаг. Монголын нөхцөлд гол төлөв гаднын хөрөнгө оруулалттай компаниуд арай дэвшилтэт технологийг оруулж ирэх хандлага ажиглагдаж байгаа. Энэ тал дээр гаднын хөрөнгө оруулалтыг маш сайн татсанаар илүү чанартай үйлдвэрлэлийн технологийг оруулж ирэх боломжтой гэсэн үг. Тэгэхээр хөрөнгө оруулагчдадаа ээлтэй орчин бүрдүүлэх зайлшгүй шаардлага байна" гэв.

Эх сурвалж:www.polit.mn