Б.БАЯРЖАВХЛАН

Геологийн салбар үүсэж хөгжөөд 83 жил болжээ. Гэвч сүүлийн жилүүдэд хууль эрх зүй болон тусгай зөвшөөрөл, хүний нөөц бага зэрэг олон асуудал тулгамдах болжээ. Ойн хүрээнд “Геологийн салбарын тулгамдсан асуудал, шийдэл” хэлэлцүүлгийг зохион байгууллаа.

Тус хэлэлцүүлэгт Геологийн салбарын бүх л эрхмүүд цугласан байлаа.

Энэ үеэр МУИС-ийн геологи, геофизикийн тэнхимийн эрхлэгч  Б.Эрдэнэцогт “ Манай Монгол Улсын Их сургуулийн хувьд 2012 оны үед геологи, геофизикийн сургуульд 150 гаруй оюутан төгсдөг байсан бол одоо 30 хүрэхгүй оюутан төгсдөг болсон. Энэ нь манай геологийн салбарыг хүний нөөцийн дутагдалд оруулж байна. Уг нь манай оюутнуудын хувьд гуравдугаар күрсээсээ байгууллагуудын захиалгаар цалинтай дадлагад гарч, дөрөвдүгээр күрсээсээ үндсэн ажилтан болдог давуу талтай. Гэвч эрэлттэй мэргэжлүүдийн тоонд орохоо больсон зэрэг  нь элсэлт багасахад ихээхэн нөлөөлж байна” гэсэн юм

Ашигт малтмал, газрын тосны газрын ашигт малтмал хайгуулын хэлтсийн дарга М.Энхжаргал “Манай геологийн салбарт сүүлийн жилүүдэд тулгамдаж буй олон асуудал байна. Тодруулбал, Ашигт малтмалын хайгуул, ашиглалтын шатыг ялгаж салгаж мэдэхгүй. Хайгуулын салбарын болон хууль эрх зүйн мэдлэг, мэдээлэл муу. Хайгуулын ажил хийх нэрийн доор их хэмжээгээр уулын ажил төлөвлөж олборлолт явуулах гэдэг. Мөн хайгуулын ажлаа төлөвлөгөөний дагуу хийдэггүй. Үүнийгээ хөрөнгө мөнгө, ковид-19 зэргээс шалтгаалсан гэж тайлбарладаг. Хуурамч тайлан ирүүлэх зэрэг олон учир дутагдал байна. Тиймээс эрх зүйн орчныг сайжруулах, иргэдэд геологи, хайгуул юу вэ гэдгийг ойлгуулахаас гадна орон нутгийн иргэдэд салбарын талаарх зөв ойлголтыг олгох нь зүйтэй байна” гэв.

Мөн геологийн судалгаа зураглал, эрэл хайгуулын үе шатанд геологи, геохими, геофизик, гидрогеологи, инженер геологи, өрөмдлөгийн ажлын иж бүрэн цогцолбороор бүрэн төгс хийлгэх, геофизикийн судалгааны мэдээллийг геологчид ашиглаж, геологи, геофизикийн нэгдсэн боловсруулалт, тайлалтын тайланг хүлээж авдаг болоход яам, агентлагууд анхаарч мэргэжлийн зөвлөхөөр хангахыг санал болгож байсан юм.

эх сурвалж: www.polit.mn