Т.САЙХАН

УИХ-ын чуулганы нэгдсэн хуралдаанаар Шүгэл үлээгчийн эрх зүйн байдлын тухай хуулийг хэлэлцүүлэг өрнөж байна.  Энэ үеэр  УИХ-ын гишүүн Х.Булгантуяа "Шүгэл үлээгчийн талд шийдвэрлэгдсэн хэрэг олон улсад бага байдаг. Англи улсад гэхэд жилд 224 гомдол гаргахад 13.8 хувь буюу 31 нь шийдэгддэг. Японд 4.5 хувьтай байдаг. Ихэнх тохиолдолд шүгэл үлээгчийн эсрэг Эрүүгийн хэрэг үүсгэдэг. Монголд хууль гаргаад хамгаалагдах болов уу гэдэгт үнэхээр эргэлзэж байна.. Шүүгч нар шударга байж чадах уу гэв.  Түүний асуултад "Транспэрэнси Интернэшнл" байгууллагын тэргүүн Л.Төр-Од "Бидний зүгээс авлигын төсөөллийн индекс, авлига өгөгч нарын судалгааг гаргадаг. Төрийн болон орон нутгийн өмчийн оролцоотой компаниуд байгууллагын нууц гэдэг байдлаар төрийн, орон нутгийн өмчийг шамшигдуулдаг. Эрх мэдлээ хэтрүүлэн хэрэглэж, авлига, албан тушаал, ашиг сонирхлын зөрчил гаргадаг хэргүүд түгээмэл байна.  Шүүгч, прокурор гээд хууль сахиулах байгууллагууд дотор авлига, албан тушаал, ашиг сонирхлын зөрчилдөөн байна. Тийм учраас 2019 онд АТГ-ын үйл ажиллагаанд хөндлөнгийн хяналт оруулж байсан. Шүүх, прокурор, өмгөөлөгч нар өөрсдөө өндөр ёс зүйтэй байж, авлига, албан тушаалын хэргээр мэргэшүүлэх шаардлагатай. Шаардлагатай бол нийт шүүгч, прокурорыг дахин сонгон шалгаруулалтад оруулж, энэ чиглэлээр мэргэших төрийн албан хаагчдыг бэлдэх талаар онцгой анхаарах талаар зөвлөмж гаргасан. Зөвхөн хууль гаргаад зогсохгүй хэрэгжилт сайн байж авлигын индекс буурна" гэлээ. 

Эх сурвалж:www.polit.mn