Т.САЙХАН

Төрийн ордны Их танхимд “Төсөв-2023” хэлэлцүүлэг болж байна. Тус хэлэлцүүлэгт УИХ-ын дарга Г.Занданшатар, Ерөнхий сайд Л.Оюун-Эрдэнэ, УИХ-ын гишүүн Эдийн засгийн хөгжлийн сайд Ч.Хүрэлбаатар, УИХ-ын гишүүн Сангийн сайд Б.Жавхлан, УИХ-ын гишүүн Төсвийн байнгын хорооны дарга Г.Тэмүүлэн болон бусад албаны төлөөлөл, төсөв захиран зарцуулагчид, олон нийтийн төлөөлөл оролцож байгаа юм.

"Төсөв-2023" олон нийтийн хэлэлцүүлгийн хүрээнд УИХ-ын гишүүн Г.Тэмүүлэн зарим асуултад хариуллаа. Тэрбээр " Нэгдүгээрт, 20 орчим хоногийн хугацаанд төсвийг цахим орчинд байршуулж, иргэдэд мэдээлэл олгосон. Улмаар 10 хоногийн хугацаанд иргэдээс санал, зөвлөмж, шүүмж авах ажлыг зохион байгууллаа. Өнөөдрийн байдлаар нийт 1000 орчим санал олон нийтээс болон төрийн бус байгууллага, иргэний нийгмийн байгууллагуудаас ирсэн. Өнөөдрийн зөвлөлдөх уулзалтаар иргэдээс ирсэн 1000 орчим саналыг эрэмбэлж, салбар хороодод танилцуулна. Иргэдээс ирсэн саналуудын 25 орчим хувь нь төсвийн болон нийгэм, эдийн засгийн бодлоготой холбоотой байсан. Үлдсэн 50 орчим хувийн санал нь эрүүл мэнд, боловсролын салбарт тулгамдаж буй асуудлууд байсан. Тэдгээр асуудлыг судалж, эрэмбэлнэ. Түүнчлэн иргэд хавтгайрсан халамжийг хязгаарлаж, хөдөлмөр эрхлэлтийг дэмжих бодлого явуулах шаардлагатай гэсэн санал ирүүлсэн" гэв.

Монгол Улс Төсөв батлахынхаа өмнө анх удаагаа олон нийтийн дунд хэлэлцүүлэг өрнүүлж иргэдийн болон татвар төлөгчдийн саналыг нээлттэй сонсохоор болсон нь энэ юм. Мөн хэлэлцүүлэг эхлэхээс өмнө D-parliament цахим платформ ашиглан төсвийн талаар олон нийтийн санал шүүмжлэлийг хүлээн авч өнөөдрийн хэлэлцүүлэгт тусгаж байна. Өнгөрсөн хугацаанд D-parliament аппликэйшнээр дамжуулан 68 641 хүн цахим системд ханджээ.

Эх сурвалж:www.polit.mn