С.Уянга

Урин дулаан цаг болж хөдөөг зорих иргэдийн хөл хөдөлгөөн нэмэгдсэн. Иймд НЗЦГ-аас орон нутгийн замд хяналт тавихаар болжээ. Зөрчил илэрсэн тээврийн хэрэгслүүдийг хот руу буцаах бөгөөд  энэ сарыг дуустал 24 цагаар хяналт тавих юм. НЗЦГ-ын Урьдчилан сэргийлэх хэлтэс Хөдөлгөөний Аюулгүй Байдлыг Хангах хэлтсийн албан хаагчидтай хамтран Улаанбаатараас Дархан, Эрдэнэт, Налайх, Багануур, Төв аймгийн Лүн, Баянцогт сумын чиглэлд зорчиж буй хот хоорондын зорчигч тээврийн үйлчилгээний жолооч, хөдөлгөөнд оролцогчдод хяналт тавьж байгаа юм.  Шалгалт эхэлснээс хойш  багагүй зөрчил илэрчээ. Тухайлбал Завхан аймгаас Улаанбаатар хот руу явж байсан 85-16 ЗАА дугаарын хот хоорондын зорчигч тээврийн автобусны жолооч 44 зорчигчтой  хурд хэтрүүлсэн,Говь-Алтай аймгаас -Улаанбаатар  хот руу явж байсан 03-51 ГАА дугаарын хот хоорондын зорчигч тээврийн автобусны жолооч нь 39 зорчигчтой хурд хэтрүүлсэн, Улаанбаатар хотоос Архангай аймгийн чиглэлд явж байсан 96-09 АРХ дугаарын хот хоорондын зорчигч тээврийн автобусны жолооч Лхамаа мэргэшсэн жолооны үнэмлэхгүй, ээлжийн жолоочгүй,8-20 ЗАА, 84-85 БНХ дугаарын хот хоорондын зорчигч тээврийн автобусны жолооч нар нь ээлжийн жолоочгүй замын хөдөлгөөнд оролцож явахад нь саатуулан Улаанбаатар хот руу буцаажээ. Иймд жолооч нарыг  орон нутагт зорчих, орон нутгаас нийслэлийг зорихдоо  замын хөдөлгөөний дүрэм болоод бусад нийтээр дагаж мөрдөх хууль дүрмийн хэрэгжилтийг сайтар дагаж мөрдөхийг НЗЦГ Урьдчилан сэргийлэх хэлтсээс анхааруулж байна.