Б.ОД

Нийслэлийн  цэцэрлэгийн гуравдугаар шатны цахим бүртгэл үргэлжилж байна. Нийслэлийн боловсролын газраас цэцэрлэгийн бүртгэлтэй холбоотой зарим асуултад хариулт авлаа.

-Өмнөх шатны хүсэлтээр цэцэрлэгт хуваарилагдсан ч гэрээ байгуулаагүй тохиолдолд дахиж цэцэрлэгт хамрагдах хүсэлт гаргаж болох уу?

- Цэцэрлэгтэй гэрээ байгуулаагүй буюу цэцэрлэгт бүртгэл хийлгээгүй тохиолдолд хүсэлт гаргах боломжтой.

- Цэцэрлэгийн элсэлттэй холбоотой мэдээллийг хаанаас авч болох вэ?

- Элсэлтийн мэдээллийг E-mongolia.mn болон parent.edu.mn цахим систем, Төрийн үйлчилгээний иргэд олон нийттэй харилцах төвийн 11-11, Нийслэлийн боловсролын газрын 7011-3039, Боловсролын ерөнхий газрын 75778080 дугаарт хандан мэдээлэл авах боломжтой.

- Хүүхдээ ямар цэцэрлэгт хуваарилагдсанаа хэрхэн мэдэх вэ?

-Энэ оны аравдугаар сарын 27-ноос хойш бүртгэлтэй утасны дугаарт мессежээр мэдээлнэ.

-Орон нутгийн хаягтай болон түр оршин суугч иргэд хүүхдээ хэрхэн цэцэрлэгт хамруулах вэ?

- Нийслэлд түр оршин суух хаягийн бүртгэлээ оршин суугаа хороонд хийлгэсэн бол энэхүү үйлчилгээгээр хүсэлт илгээх боломжтой.

-Одоо хувийн цэцэрлэгт хамрагдсан хүүхдийг улсын цэцэрлэг рүү шилжүүлж болох уу?

-Цэцэрлэгт бүртгэлтэй тул хүсэлт илгээх боломжгүй. Бүртгэлээ тухайн цэцэрлэг дээрээ хасалт хийлгэсний дараа хүсэлт илгээх боломжтой.

- Өмнөх жилүүдэд хяналтын тоонд багтаагүй хүүхдийг бүртгүүлж болох уу?

-E-mongolia.mn системийн “Нийслэлийн цэцэрлэгт хамрагдах хүсэлт 3” хэсэгт цэцэрлэгт хамруулах хүсэлтээ илгээж болно.

-Хүүхдийн итгэмжлэгдсэн төлөөлөгч энэхүү үйлчилгээг авах бол хаана хандах вэ?

- Хэрвээ хүүхдийн асран хамгаалагч/Өвөө, эмээ, ах, эгч гэх мэт/ тухайн үйлчилгээг авах шаардлагатай тохиолдолд өөрийн болон хүүхдийн бичиг баримтын бүрдүүлэн өөрт ойр байрлах төрийн өмчийн цэцэрлэг дээр очиж дэмжих багийн тусламжтайгаар хүсэлтээ илгээлгэх боломжтой.

- E-Mongolia аппликэйшн ашиглах боломжгүй бол хэрхэн бүртгүүлэх вэ?

-Эцэг эх, асран хамгаалагчдаас нийслэлийн цэцэрлэгт хамруулах хүсэлтийг аравдугаар сарын 10-21-ний өдрийн 17:00 цаг хүртэл e-Mongolia.mn системээр хүлээн авна. e-Mongolia.mn-ээр хүсэлт илгээх боломжгүй бол өөрт ойр байрлах төрийн өмчийн цэцэрлэгээс дэмжлэг авч хүсэлтээ илгээх боломжтой.

Эх сурвалж:www.polit.mn