Э.ЭНХТӨГС

Сагсан бөмбөгийн 17 дахь удаагийн ДАШТ энэ сарын 30-аас ирэх сарын 14-ийг дуустал Испани улсад  болно. Испанийн Мадрид , Барселона, Си­вилля хотод болох тус тэмцээнд дэлхийн шил­дэг сагсчид чуулах юм.

Дэлхийн эв найрамдлын бэлгэ тэмдэг болсон хөлбөмбөгийн ДАШТ-ий араас хүлээлт үүсгээд буй тус тэмцээнийг “Тv9” телевиз албан ёсны онцгой эрхтэйгээр шууд дамжуулахаар болжээ. Телевизийн хамт олон  2010 онд Турк улсад болсон 16 дахь удаагийн дэлхийн аваргын тэмцээнийг шууд дамжуулж байсан туршлагатай. Тиймээс сагсан бөмбөг сонирхогчдод  мэргэжлийн өндөр төвшинд, сонирхолтой болон содон агшинг алдалгүй үзүүлнэ гэдгээ амлалаа. Харин энэ удаагийн тэмцээний тайлбарлагчаар  гавьяат дасгалжуулагч Ц.Цэвэрбал болон Б.Дамба, С.Тулга нар ажиллах юм. Тэд үдэш бүрийн 19:30, 22:30 болон 03:00 цагуудаас үзэгчидтэйгээ уулзах гэнэ. Тэмцээнд дэлхийн шилдэг 24 баг оролцох бол Ази тивээс гурван улсын баг оролцохоор болжээ. Мөн тэмцээний өмнө МҮСБХ-оос фанатуудынхаа дунд шилдэг 24 багийн тоглолтыг зохион байгуулахаар болсноо дуулгав. Оролцогчид энэ сарын 13-20-ыг дуустал дэмжиж буй багийнхаа нэр, логог ашиглан тэмцээнд оролцох боломжтой. Тэмцээний шууд дамжуулалтын хамтран зохион байгуулагчаар “MCS coca cola”, “Skytel”, “MNBA sport tv” болон МҮСБХ-ны хамт олон ажиллаж байна. Сонирхуулахад өнөөдрөөс үдэш бүр 22:30 минутаас “Тv9” телевизээр тэмцээнд оролцох багуудын танилцуулга, нэвтрүүлэг гарч эхлэх юм байна.