Б.ОД

2021 оны аравдугаар сарын 1-ний өдрөөс эхлэн манай улсыг зорих жуулчдын тоогоор тэргүүлдэг Европын улс, Австрали, Шинэ Зеланд, БНСУ, БНХАУ зэрэг гадаадын 36 улсын иргэд  цахим виз мэдүүлэх боломжтой болсон.

Ингэснээр өнөөдрийн байдлаар 36 улсын 6725 иргэнд цахим виз олгожээ. Үүнээс хамгийн олон визийг Франц, Солонгос болон Их Британийн иргэд мэдүүлсэн  гэж Гадаадын иргэн, харьяатын газрын дарга Н.Ууганбаяр мэдээлэв.

Тэрбээр “Дэлхийн улс орнууд цахим виз нэвтрүүлж, гадаадын иргэдэд хүргэх төрийн үйлчилгээг улам бүр хөнгөвчилсөөр байна. Манай улс ч дэлхий нийтийн энэ хандлагад нийцүүлж, гадаадын иргэдэд хүргэх үйлчилгээг хялбаршуулж, виз олгох үйл ажиллагааг олон улсын жишигт нийцүүлэх зорилт тавин ажиллаж байна. Хууль зүй дотоод хэргийн яам, Гадаад харилцааны яамтай хамтран цахим визийг нэвтрүүлснээр төрийн үйлчилгээг чирэгдэлгүй шуурхай үзүүлж, иргэдийн зорчих нөхцөлийг хөнгөвчлөх, цаг хугацаа, зардлыг хэмнэх, мөн энэ хэрээр жуулчдын тоо нэмэгдэх зэрэг бодит үр дүнгүүд харагдаж байна.Өмнө нь гадаадын иргэд виз мэдүүлэхийн тулд заавал Монгол Улсын Дипломат Төлөөлөгчийн газарт очих, цаг авах, дараалал хүлээх зэргээр хүндрэлтэй асуудалтай багагүй тулгардаг байсан. Тэгвэл одоо дээр дурдсан 36 улсын иргэд дэлхийн хаанаас ч интернэт сүлжээнд холбогдон гуравхан үйлдлээр цахим визээ мэдүүлэх боломжтой болсон” гэв.

Тодруулбал, www.evisa.mn системд илгээсэн хүсэлтийг хянаж үзээд зөвшөөрсөн тохиолдолд тухайн иргэний мэдээллийг агуулсан QR код хэлбэртэй цахим визийг тухайн иргэний и-мэйл хаягаар 48 цагийн дотор илгээж байгаа юм.

Эх сурвалж:www.polit.mn