Б.ДАРЬСҮРЭН

УИХ-ын Байгаль орчин, хүнс, хөдөө аж ахуйн байнгын хороо хуралдлаа. Энэ үеэр БОАЖ-ын сайд Б.Бат-Эрдэнэ агаарын чанар, шахмал түлшний нөөц, стандартын талаар мэдээлэл өгсөн юм.

Тэрбээр "Өнгөрсөн сарын 15-нд шахмал түлшний борлуулалт эхлэхээс өмнө нийт 140 мянган тонн сайжруулсан шахмал түлшийг нөөцөлсөн. Өнөөдрийн байдлаар нөөцийн хэмжээ 117 мянган тонн байна. Жилд 20 мянган тонн барьцалдуулагч шаардлагатай байдгаас 10 тонныг БНХАУ-аас импортолж, 10 мянган тонныг дотоодын хоёр ААН нийлүүлэх гэрээтэй. Одоо дөрвөн мянган тонн барьцалдуулагч БНХАУ-аас авахаар гэрээ хийсэн, хил дээр саатал гарахгүй бол ойрын хугацаанд авна. 

Цаашид "Тавантолгой түлш" ХХК шахмал түлшний барьцалдуулагчийг хүхэр, чийгийн хэмжээ багатайгаар үйлдвэрлэх боломжтой гэх судалгааг танилцуулсан. Түүнчлэн одоогийн мидлинг, барьцалдуулагчаар шахмал түлшийг сайжруулна гэж байхгүй. Хагас коксжсон түлшийг хэрэглэж, үйлдвэрийн үйл ажиллагааг эхлүүлэх хэрэгтэй. 2024 оны I улиралд багтааж хагас коксын үйлдвэр ашиглалтад орсноор хагас коксын түлшийг нийт хэрэгцээнд нийлүүлэх болно. ТЭЗҮ-ийг гаргасан, УУХҮЯ дээр батлагдахыг хүлээж байна.

Урт хугацаандаа иргэдээ орон сууцжуулж, эрчим хүчний хангамжийг нэмж, хий ашиглах зэргээр утааг 100 хувь хална. Энэ бол зөвхөн Улаанбаатар хотын хэмжээнд биш улс даяар хэрэгжүүлэх систем юм" гэлээ. 

Эх сурвалж: www.polit.mn