Б.НЯМСҮРЭН

Ватиканы тэргүүн, Ромын пап лам Франциск өнгөрсөн тавдугаар сард шинээр кардинал цол хүртэж буй 21 санваартны нэрийг зарлаж байсан бол, үүнээс гурван сарын дараа тэдэнд  Кардинал цол хэргэмийг нь гардуулан өгчээ.  Ватиканд болсон энэхүү ёслолын үеэр хамгийн залуудаа Католик шашны дээд цолыг хүртсэн эрхэм байсан нь манай улсад үйл ажиллагаа явуулдаг Католик шашны тэргүүн  М.Жиоржио аж.

Тэрээр  48 настайдаа Ватиканы Кардиналын бүлгэмийн гишүүн болж, түүхэн дэх хамгийн залуу кардинал болсон нь энэ.  Италийн Турин хотын уугуул тэрээр 2003 оноос хойш Монголд амьдарч байгаа бөгөөд Өвөрхангай аймагт 16 жил суурьшин амьдарсан Монголд элэгтэй нэгэн аж. Кардинал М.Жиоржиогийн үйл ажиллагааг нь удирдан явуулдаг Монгол дахь Католик шашны төв нь одоогоор 1400 гаруй сүсэгтэн олонд үйлчилдэг гэнэ.  Энэ нь олон улстай харьцуулахад харьцангуй цөөн гишүүнчлэлтэй боловч түүнд Ромын пап Кардинал хэмээх эрхэм хүндэт цол олгосон нь Монгол Улсыг онцгойлон үздэгийн илрэл болсон гэж залуу кардинал "Зууны мэдээ" сонины "Трэнд зочин" буланд өгсөн ярилцлагадаа онцолсон юм. Дашрамд дурдахад,  Ватиканд төвтэй Кардиналын бүлгэм нь 226 гишүүнтэй үйл ажиллагаа явуулдаг зөвхөн тэдний дундаас Католик шашны тэргүүн, пап ламыг тодруулдаг уламжлалтай юм.

Эх сурвалж: www.polit.mn