Т.САЙХАН

Цар тахлын хөл хорио суларснаас хойш зүүн өмнөд азийн орнуудад 20-35 насны залуучууд хүн худалдаалах гэмт хэрэгт өртөж, амь нас, эрүүл мэндээрээ хохироод байна. Манай улсын иргэд ч энэ төрлийн гэмт хэргийн хохирогч болох эрсдэлтэй байгааг ТЕГ-аас мэдээллээ. Тодруулбал, дотоод мөргөлдөөний улмаас газар нутгийн зарим хэсэг нь зэвсэгч босогчдын мэдэлд ороод байгаа Мьянмар улсын "КК парк" гэх газар Монгол Улсын тодорхой тооны иргэд хохирогч болсон нь тогтоогдоод байгаа аж. "КК парк"-д цахим луйвар, биеэ үнэлэлт, хөдөлмөрийн мөлжлөг болон мансууруулах бодисын хууль бус худалдаа зохион байгуулдаг талаар хил залгаа орнуудын хууль сахиулах байгууллагаас анхааруулж, өөрийн иргэдээ гэмт хэрэгт өртөхөөс урьдчилан сэргийлж эхэлсэн байна. Гэмт үйлдлээ хэрэгжүүлэхдээ цахим орчинд хятад, англи хэлний орчуулагч, хүний нөөцийн мэргэжилтэн ажилд авна гэж, өндөр цалин, хангамж амалсан зар, мэдээлэл оруулж, иргэдийг хууран мэхэлдэг байна. Улмаар онгоцны зардал, зочид буудал, даатгал, хоолны зардал зэргийг хариуцсан нэрээр өрийн дарамтанд оруулан, цэцэгжсэн хамгаалалтын дор албадан хөдөлмөр эрхлүүлдэг аж. Хохирогчид бусдын хүчинд автан, шинээр хүн олж авчирах, зуучлах ажил гүйцэтгэж байгаа нь нөхцөл байдлыг хүндрүүлж байгаа аж. Гадаадын хууль сахиулах байгууллагаас "КК парк"-д хоригдож, албадан хөдөлмөр эрхэлж байгаа иргэдээ чөлөөлж, эх оронд нь буцаах ажлыг тасралтгүй хэрэгжүүлж байгаа ч тухайн бүс нь цэвсэгт босогчдын мэдэлд байгаа тул энэ ажил удаашралтай байгаа юм байна. ТЕГ-аас хүн худалдаалах гэмт хэргээс урьдчилан сэргийлэх, таслан зогсоох, иргэдээ эх оронд нь аюулгүй, буцаан авч ирэхээр төрийн холбогдох байгууллагуудтай хамтран ажиллаж байгаа юм. Тиймээс өндөр цалин амласан, гадаад руу зуучилна гэх худал мэдээлэлд автаж, гаднын улсыг зорихгүй байхыг анхаарууллаа. Энэ төрлийн гэмт хэрэгт үйлдсэн, хамтран оролцсон тохиолдолд хуулийн хариуцлага хүлээнэ гэдгийг холбогдох байгууллагаас мэдээллээ.

Эх сурвалж:www.polit.mn