Б.ДЭМБЭРЭЛНЯМ

2008 онд NBA-ийн агуу ривал Бостон Селтикс, Лос Анжелес Лэйкэрс багууд аваргын төлөөх цувралд учраа таарсан. Тус цувралд Бостон 4:2-оор хожсон. "Ялагдсан хүний үгийг сонс" гэдэг үг байдаг. 2008 оны долдугаар сарын  7-нд  Бостоны “TD  Garden”-д Лэйкерс 20 оноогоор хожиж яваад харамсалтайгаар хожигдсон. Ингэснээр тэд цувралд 0:2-ээр хожигдож эхэлсэн. Хэдийгээр энэ цувралд Лэйкерс ялагдсан ч 2009, 2010 онд дараалан аварга болсон. Хожим алдарт дасгалжуулагч Фил Жексон “2008 оны финалын хоёр дахь тоглолт бидний олон ялалтын эхлэл болсон” гэж онцолсон байдаг. NBA-ийн 11 бөгжтэй домогт дасгалжуулагчийн агуу замналынхаа нэгэн чухал тоглолтын дараа юу гэж ярьж байсныг  “ Амжилтын эзэн” булангаараа эргэн сануулж байна.

-Таныг хамгийн их гайхшруулсан зүйл юу вэ. Танай багийн эхний гурван үеийн төгс тоглолт уу. эсвэл дөрөвдүгээр үед оноо авахад хэцүү байсан уу?

-Бидний хамгаалалтын алдаа намайг их гайхшруулж байна. Инээдтэй юм.  Бид эхний хагаст тэднээс 19 оноо илүү авсан.  Ийм тоглолтдоо хожигдоно гэдэг байж боломгүй зүйл. Би финалд дасгалжуулагчаар ажилласан энэ олон жилийн хугацаанд ийм тоглолтыг хэзээ ч харж байгаагүй.  Итгэмээргүй юм.

 -Та шигшээ цувралд 0:2-оор хоцорч байгаа талаараа  юу гэж хэлэх вэ. Тоглогчдынхоо сэтгэл зүйд  хэрхэн анхаарах вэ?

-Энэ бол плэй-оффын нэг хэсэг. Би үүнийг талбайн давуу тал гэж харж байна. Тэд гэрийн даалгавраа сайн биелүүлж талбайдаа хоёр хожлоо. Харин одоо бид гэртээ хоёр тоглоно. Би үүнийг тийм ч муу зүйл гэж харахгүй байгаа.

-Дөрөвдүгээр үеийн эхэнд Пау Гасол самбарын доороос бөмбөг алдаж эсрэг багтаа хоёр дахь боломжийг олон удаа гаргасан. Тэр үед би гайхаж байлаа. Лэйкерс илүү хүчирхэг тоглож, хяналтыг гартаа авах боломжтой юу?

-Тийм ээ.  Та зөв анзаарчээ. Тэд  Владдиг будаг талбайгаас гадуур тоглох нөхцөл байдал үүсгэж байсан. Ингэснээр Гарнетт самбарын доор Гасолыг илүүрхлээ.  Энэ бол бидний хүсээгүй муу зүйл. Маш муу. Гуравдугаар үед би “Бид байж болох хамгийн муугаараа тоглож байна” гэж багийнхандаа хэлсэн. Бид үүнээс илүү муу тоглож чадахгүй.  Энэ муу тоглолт нь бидний хамгаалалтын самбарт хайнга, олон онооны давуу тал авсандаа хэт тайвширсан байдал нөлөөлсөн гэж бодож байна.

-Улирлын турш эсрэг багийн талбайд сайн тоголсон Селтикс танайд зочлох гэж байна. Тэд ямар тактиктай байгаа гэж бодож байна?

-Би Селтиксийн юу бэлдсэн талаар санаа зовохгүй байна. Лэйкэрс яаж тоглох бол гэж л санаа зовж байгаа.  Бид довтолгооны төгсгөлөө сайн хийж, илүү чамбай тогломоор байна.

-Селтиксийн дасгалжуулагч Риверс түүний баг тоглолтын төгсгөлд илүү хүчтэй тоглосон. Энэ нь эргэн ирэхэд нөлөөлсөн байх гэж хэлсэн. Үүнтэй санал нэгдэх үү?

-Сагсан бөмбөг бол эрч хүч юм.  Гагцхүү эрч хүчийг хэн авч явах вэ гэдэг л чухал.  Бид эхний хагаст тэднээс илүү эрч хүчтэй байсан. Гарнетт техникийн алдаа авах үед бид 15:7-оор тэргүүлж байсан. Түүнээс хойш тогтолт эргэсэн. Тэд гуравдугаар үеийн сүүлийн 2 мин 59 сек, дөрөвдүгээр үеийн эхлэлд маш сайн тоглосон. Тэр эрчээ алдалгүй явсаар биднийг хожлоо.  Энэ тоглолт бид залуу багийн хувьд тоглолтын хэмнэлийг өөрчлөх өөрийн талд эргүүлэх тал дээр суралцах ёстой гэдгийг харууллаа.

-Тоглолтын төгсгөлийн нөхцөл байдал гурав дахь тоглолтод үүсвэл яах вэ?

-Үгүй, би тийм зүйл болохгүй гэж бодож байна. Учир нь бид 2500 милийн цаана тоглолтоо хийнэ.  Үүнийг авч явахад хэтэрхий хол байна.

-Таны хэлсэнчлэн тоглолтын хэмнэлийг гартаа авч чадаагүйд танай баг хангалттай сайн байж чадаагүйд бухимдсан уу. Эсвэл тоглолтын шүүлтэд сэтгэл дундуур байгаа юу?

-Үгүй ээ, миний тоглогчид алдаа гаргасан гэж бодож байна.  Тоглогчид маань алдаа гаргасан ч зарим зүйл дээр шүүгчид асуудалтай байсныг нуухгүй. Үүнд хэд хэдэн зүйлийг тоочиж болно. Гэхдээ тэглээ гээд тоглолтын үр дүнд нөлөөлөхгүй учир энэ нь утга учиргүй зүйл юм. Би тэдэнтэй маргахыг хүсэхгүй байна.  Энэ бол сагсан бөмбөгийн нэг хэсэг.  Шүүгчид ч бас алдаж л байдаг. Хурдан темптэй тоглолтын явцад шүүгчид зарим зүйлийг харахгүй өнгөрөх, буруу шийдвэр гаргах тохиолдол гардаг. Тиймээс бид тэдний ажлыг хүндэлж байгаа.

Эх сурвалж: “Зууны мэдээ” сонин

2022 ОНЫ ЕСДҮГЭЭР САРЫН 22. ПҮРЭВ ГАРАГ. № 183 (6915)