"Зууны мэдээ" сонин “Урлаг” буландаа загварын тайзанд  тодоор гэрэлтсэн “Андра” академийн А зэрэглэлийн гэрээт модель, багш  О.Амаржаргалтай ярилцлаа.

-Та 2012 онд загварын тайзнаа хөл тавьж байсан юм билээ. Загварын ертөнцөд орсон түүхээс хуваалцаач?

-Миний хувьд хотод төрж өссөн.  Одоогоос 10 жилийн өмнө ээж маань намайг загварын дугуйланд бүртгүүлчихсэн байсан. Түүний дараа загварын сонгон шалгаруулалтад оролцох болсон. Шалгаруулалт нь   жүжиглэх , тайзны алхаа, хөгжим, зэргээр авч байсан. Сар гаруйн хугацаанд сургалтад сууж шилдэг дөрвөн хүүхдийн нэгээр шалгарч байлаа.  Тэнцсэн гэх хариуг сонсоод их баярласан. Загварын хүн болох мөрөөдөл ундарч өөртөө итгэх итгэл маань нэмэгдсэн.

-Тайзан дээр гарах үеийн сэтгэгдэл мэдрэмжээ илэрхийлээч?

-Өмсөж буй загвараасаа  өөр мэдрэмж авдаг. Тайзнаа гарахдаа загварынхаа давуу талыг  тултал гаргахыг хичээдэг. Олон удаа загварын шоунд орохоор туршлагаждаг юм билээ. Манай академийн багш нар үргэлж биднийг дэмждэг. Сэтгэл зүйн заавар зөвлөгөө өгдөг болохоор сандрал бага. Тайз бол сандралаас илүүтэй догдлолыг мэдрүүлдэг.

-Хүмүүсийн дунд өндөр, сайхан биетэй залуус загвар өмсөнө гэсэн ойлголттой байдаг?

- Хүмүүсийн дунд нийтлэг ойлголт нь хөөрхөн хүмүүст илүү боломж бий гэдэг. Харин миний хувьд үүний эсрэг бодолтой. Учир нь  хүн гадаад үзэмж, гоо зүйдээ анхаарснаар өөрийнхөө үнэ цэнийг нэмэгдүүлдэг юм. Олон улсад  тайзны модельд өндөр, жин, биеийн харьцаа заасан байдаг. Харин монголд харьцангуй тийм зүйл бага. Муухай, царай муутай гоо үзэмжгүй хүн гэж байдаггүй. Ямар ч хүн өөртөө анхаарвал сайхан харагдах боломжтой.

-Таны баримталдаг зарчим юу вэ?

Хувь хүн талаасаа “Андра” академи надад ихийг сургасан. Өөртөө хүсээгүй зүйлээ бусдад  мэдрүүлэхийг хүсдэггүй.  Тухайлбал, эерэг хандлагатай байх, гадаад үзэмж, биеэ зөв авч явахыг хичээдэг. Өөрийгөө мэдлэгээр цэнэглэж цаг ямагт хөгжихийг эрмэлздэг нь миний баримталдаг зарчим юм.  Хүйтэн, халуун, гадаа, дотор гэх зүйл байдаггүй. Ямар ч нөхцөл байдалд  загвараа сайн гаргах хэрэгтэй. Өвөл цамцтай зураг авалтад орлоо гэхэд даарч байгаагаа гаргах ёсгүй. Тиймээс тэвчээр суудаг талтай.

-“Андра” академитай хэрхэн холбогдож байв?

-Гадаадад сурч байгаад 2019 онд эх орондоо ирсэн.  Тухайн үед манай академид моделийн цогц сургалт явагдсан юм. Академийн захирлын  даасан ангид ороод хоёр сарын хугацаанд их хичээж суралцсан. Тэгээд л “А” зэрэглэлийн гэрээт моделоор ажиллаж эхэлсэн. Одоогоор анги дааж аваад багшилж байна.

-Модель болсноор танд ямар өөрчлөлт гарсан бэ?

"Андра" академийн багш, топ модель Х.Бадамгэрэл, н.Энхтуяа гээд үе үеийн мундаг захирал, багш нараасаа үргэлж суралцдаг. Хүн бүрийн өмнө боломж  нээлттэй байдаг. Тууштай байсан хүн амжилтад хүрдэг гэж захиж хэлдэг. Мөн өөрийгөө дутуу үнэлэхгүй байхыг багш нараасаа суралцсан. Миний хувьд хүн бүрт чадвар байдаг гэж боддог. Чадвараа мэдлэгээр усалж хөгжүүлэх хэрэгтэй.  Учир нь би бага байхдаа өөртөө итгэлгүй байлаа. Тэгээд загварын ертөнцтэй холбогдож эхлээд өөртөө итгэх итгэлээ нэмэгдүүлж, бусадтай харьцахдаа нээлттэй болсон. Өөрийгөө бусдад илэрхийлэх чадвараа хөгжүүлсэндээ баярладаг. Олон чадваруудад суралцсан. Харилцааны соёл, багаар ажиллах, алхааны техник, манлайлал, танилцуулга хийх  чадвар зэрэг тоочоод барамгүй зүйлийг эзэмшсэн.

 -Загварын шоунд ороход урьдчилж бэлддэг үү?

-Мэдээж тодорхой хугацаанд бэлдэнэ. Нэг шоу зарлагдлаа гэхэд  багш нар маань мэдээлэл, зөвлөгөө өгдөг. Шоунаас өмнө өөртөө анхаардаг. Тухайлбал арьс арчилгаа, үс засалт зэрэг. Мөн сэтгэл зүйгээ эерэг сайхнаар дүүргэх хэрэгтэй.

-Уншигчдад мөрөөдлөөсөө хуваалцаач?

-Монголдоо өөрийнхөө үнэ цэнийг бий болгоно. Тиймээс өөрийгөө сайтар хөгжүүлэх хэрэгтэй гэж боддог. Цаг хугацаатай уралдан хөгжиж мөрөөдөлдөө хүрнэ. Олон улсын хэмжээний модель болох зорилготой.

Эх сурвалж: “Зууны мэдээ” сонин

2022 ОНЫ ЕСДҮГЭЭР САРЫН 14. ЛХАГВА ГАРАГ. № 177 (6909)