Ц.БАЯР

“Монгол Улстай бизнес эрхлэх нь хууль, татвар, хилийн хорио, эдийн засгийн тусгай бүс” сэдэвт Монгол-Камбожийн бизнесийн орчны семинар уулзалт өнөөдөр боллоо. Тус уулзалтыг Германы олон улсын хамтын ажиллагааны нийгэмлэгийн Камбож улс дахь хувийн хэвшлийн өрсөлдөх чадварыг дэмжих хөтөлбөр, Нийслэлийн дагуул хот, эдийн засгийн тусгай бүс хөгжлийн газар, ”Дорнын түншлэл” бизнесийн зөвлөл хамтран зохион байгуулав. Тус арга хэмжээг нээж Германы олон улсын хамтын ажиллагааны нийгэмлэгийн хөтөлбөрийн захирал Др. Штефан Ханселманн, Нийслэлийн дагуул хот, эдийн засгийн тусгай бүс хөгжлийн газрын дарга Б.Мэндсайхан нар үг хэлж, шинэ түншлэлд амжилт хүслээ. Монгол-Камбож хоёр улсын худалдаа, эдийн засгийн хамтын ажиллагааг тэлэх, бизнесийн шинэ түншлэлийг эхлүүлэх зорилгын хүрээнд оролцогч талууд мэдээллээ хуваалцсан юм. Камбож улсын бизнес эрхлэгчид өөрсдийн бараа, бүтээгдэхүүний дээжээсээ танилцуулж, Монгол Улсын хууль эрх зүйн орчин, бизнесийн орчны талаар дэлгэрэнгүй мэдээлэл авлаа. “Дорнын түншлэл” бизнесийн зөвлөлийн зөвлөх, судлаач Б.Дашравдан эхний илтгэлийг хэлэлцүүлсэн бөгөөд Монгол-Камбожийн бизнесийн орчин, Зүүн өмнөд азийн орнуудтай хэрхэн түншлэх, ямар гарц боломж байгааг онцлов. Улаанбаатар төмөр зам болон Гаалийн ерөнхий газраас татвар, хураамж, худалдааны зохицуулалт, хилийн хяналт шалгалт, хорио цээр, хууль эрх зүйн орчин болон транзит тээврийн хүрээнд дэлгэрэнгүй мэдээлэл өглөө. Камбож нь будаа, хатаасан жимс, далайн хүнсний бүтээгдэхүүн зэргийг олон улсын зах зээлд нийлүүлж, экспортолж ирсэн. Камбожийн бизнес эрхлэгчдийн аялал энэ сарын 17-ны өдрийг хүртэл үргэлжилнэ.

Эх сурвалж:www.polit.mn