Б.БАРС

Сагсан бөмбөгийн од Леброн Жеймс гурван жилийн өмнө зураг төслийг нь өөрөө гаргасан гэх “Home Court by Lebron James” нэртэй хүүхдийн өрөөний тавилгыг “American Signature” компанитай хамтран худалдаанд гаргажээ. Түүний зохион бүтээсэн тавилга маш сайн борлогдсон гэдэг. Леброн Жеймс чөлөөт цагаа хүүхдүүдтэйгээ тоглож өнгөрөөхдөө хүүхдэд зориулсан тавилгын дутагдалтай талыг гярхай анзаарч өөрийн зураг төслийг сараачих болж. Эцэст нь гэнэтийн энэ хоббигоо гайгүй ашигтай бизнес болгон хувиргаж чаджээ.

Залуусын шүтээн болсон поп дуучин Жастин Тимберлейк ч интерьер дизайны хоббитой нэгэн. Хорьдугаар зууны эхэн үеийн модерн стильд дуртай тэрээр гэрийн доторхи дизайн зохиох хоббитой. Дизайнер найзтайгаа хамтран “HomeMint” брэнд босгон шаггүй амжилтад хүрчээ.

Алдарт жүжигчин Брэд Питт уран барилгын зураг төсөл боловсруулах хоббитой бөгөөд гэрийнхээ бүх дизайныг өөрийнхөө хүссэнээр хийсэн гэдэг. Сайн зурдаг тэрээр найз Франко Полларогийн хамт дөрвөн жил зүтгэсний эцэст “Pitt-Pollaro” брэндийн гэрийн тавилгын цуглуулгыг олны хүртээл болгож тал бүрийн авьяастайгаа харуулж олныг гайхшруулсан юм.

Поп-од Бейонсе ч зөвхөн дуулж бүжиглэдэг нэгэн биш аж. Тэрээр гэрийн зөөлөн эдлэл, тэр дотроо орны өвөрмөц бүтээлэг, даавуу зохиодгоороо алдаршжээ. Хөдөлмөрч энэ бүсгүй мөн л хоббигоо дайвар бизнес болгон “House of Dereon” гэх брэндийг үүсгэн бүтээгдэхүүнээ борлуулдаг болжээ.