Б.ЖАРГАЛ
Иргэн Ч.Мөнхбаярыг гадаадын тагнуулын байгууллагатай хамтран ажилласан хэргээр Тагнуулын байгууллагаас хориод байгаа. Тэгвэл энэ талаар Ч.Мөнхбаярын өмгөөлөгч нар хэвлэлийн бага хурал хийж хуулийн байгууллагынхан хуульд заасан үндэслэлгүйгээр цагдан хорьж дарамт үзүүлж байгаа талаар мэдээлэл хийв. Энэ талаар өмгөөлөгч А.Батдорж “Хүний эрхийг хамгаалагч Ч.Мөнхбаярыг 66 хоног хорьж байна. Бид түүнийг цагдан хоригдсон 21 дэх хоногт хэвлэлийн хурал хийж байсан. Өнгөрсөн 45 хоногийн хугацаанд АШШ-ны Гэм буруугийн шүүх хурал болсон. Энэ хурлаар иргэн Ч.Мөнхбаярын гэм буруутай гэх нотлох баримтууд үгүйсгэгдэж шүүх хэргийг цагаатгах боломжтой байхад эргэлзээтэй нотлох баримт гэж үзсэн. НҮБ-ын Хүний эрх хамгаалагчдын тухай тунхаглалд Хүний эрхийг хамгаалагчдыг эрх баригчид хууль шүүхээр дарамтлах хуулиар далайлгах, гутаан доромжлох, зохиомол хэрэгт холбогдуулан шалгах, гадаадын агент нууц бүлгэмийн тагнуул, төрийн дайсан хэмээн буруутгадаг үйлдлүүдийг хориглосон байдаг. Гэтэл Монгол улс олон улсын өмнө хүлээн зөвшөөрсөн эдгээр үүргээ зөрчиж байна” гэв.
Мөн түүний өмгөөлөгч Г.Баасан “Ч.Мөнхбаярт таслан сэргийлэх арга хэмжээ авах нөхцөл бүрдээгүй. Төрийн нууц мэдээллийг гадаадад задруулсан, худалдсан хэргээр яллах гэж оролдож байна. Үүнийг Олон улсын хэмжээнд Монгол туургатнууд эсэргүүцэж суллахыг шаардаж байгаа. Монголын Тагнуул агнуулын байгууллага болж Тагнуулд итгэх боломжгүй болжээ” гэсэн юм.
Энэ хэрэгтэй холбоотойгоор Ч.Мөнхбаярын өмгөөлөгч нар Монгол Улсын Ерөнхийлөгчид болон ХЭҮК-т гомдол гаргажээ.
Эх сурвалж: www.polit.mn