Б.ЖАРГАЛ

“Кью Эс Си” компанийн эзэмшилд байсан Дарханы төмөрлөгийн үйлдвэрийн концессын гэрээг хүчингүй болгох шийдвэрийг Засгийн газраас гаргасан. Тэгвэл энэ талаар “Кью Эс Си” компаниас хэвлэлийн хурал хийж Засгийн газартай харилцан тохиролцох хүсэлтэй байгаагаа мэдэгдлээ. Тодруулбал, “Кью Эс Си” компанийн гүйцэтгэх захирал Э.Шижир “Монгол Улсын Засгийн газрыг төлөөлөх Эдийн засгийн хөгжлийн яамтай 2014 оны дөрөвдүгээр сард байгуулсан Уул уурхай металлургийн цогцолбор байгуулах төслийг хэрэгжүүлэх концессын гэрээг нэг талын санаачилгаар цуцалсан шийдвэр гаргасан. Манай компани концессын гэрээгээр хүлээсэн үүргээ хууль тогтоомжийн дагуу гүйцэтгэж ирсэн. Гангийн үйлдвэр барьж байгуулахад эрчим хүчний эх үүсвэр, газар эзэмших эрхийг хугацаанд нь олгоогүйгээс хугацаа алдсан юм. Тухайлбал, Засгийн газар, эрх бүхий этгээд эдгээр хоёр асуудлыг шийдвэрлээгүйн улмаас концессын гэрээний үүргээ биелүүлж дуусгахад саад болсон. Концессын гэрээний үүргээ биелүүлж цахилгаан эрчим хүчний хэрэглээ багатай мини Домен зуухны технологи бүхий “Монгол ган цогцолбор I” төслийн ТЭЗҮ-ийг Эрдэс баялгийн мэргэжлийн зөвлөлийн хуралдаанаар хэлэлцүүлэн өнгөрсөн оны есдүгээр сард батлуулсан. Мөн Шинэ гангийн үйлдвэрийг байгуулахад шаардлагатай газар эзэмших эрхийн хүсэлтийг 2015 оноос хойш шийдвэрлэлгүй явсаар зургаан жилийн дараа буюу 2021 оны аравдугаар сард олгосон” гэв.

Мөн тэрбээр “Монгол ган цогцолбор I” төслийн хүрээнд шинэ гангийн үйлдвэрийг 2024 онд багтааж байгуулах төлөвлөгөөг гаргаж УУХҮЯ-нд тогтмол илгээдэг байсан. Төлөвлөгөөний хэрэгжилт хэвийн явж байхад концесс эзэмшигчийг үүргээ биелээгүй гэж үзэн гэрээг цуцлах шийдвэр гаргасан. Тиймээс Монгол Улсад шинэ гангийн үйлдвэр барьж байгуулах болон түүнтэй холбоотой нөхцөл байдлыг Засгийн газартай хамтран тодорхойлох замаар маргаантай асуудлыг шийдэж харилцан тохиролцох хүсэлтэй байгаагаа мэдэгдсэн юм.

Эх сурвалж: www.polit.mn