Б.САНСАР

Украины зүүн-өмнөд хэсэгт орших Луганск болон Донецкийн мужуудад зэвсэгт мөргөлдөөн сүүлийн гурван сарын турш үргэлжлэн олон зуун хүний аминд хүрээд байгаа билээ. Украины Ерөнхийлөгч П.Порошенко тус улсын зэвсэгт хүчинд салан тусгаарлагчдын эсрэг явуулах ажиллагааг үргэлжлүүлэх тушаал өгсний дараа хэд хэдэн чиглэлд ширүүн тулалдаан өрнөжээ. Украины цэргүүд босогчдын гарт байсан Славянск, улмаар Краматорск хотуудыг хяналтдаа бүрэн авсан байна.

Луганскийн ард улсын үндэсний гварди гэгч байгууллагын удирдлагчид мэдэгдсэнээр, Украины арми ойрын үед ОХУ-тай хил залгаа Кружиловк, Давыдо-Никольск, Пархоменко зэрэг сууринд өдөөн хатгасан тусгай ажиллагаа явуулахаар бэлтгэж байгаа аж. Луганскийн “Заря” сумангийн штабаас мэдээлснээс үзвэл энэ сумангийн дүрэмт хувцас өмссөн Украины цэргүүд дээр дурдсан суурингуудыг миномётоор бөмбөгдөх гэнэ. Ингэснээр Украины тал Луганскийн ард улсын хамгаалагчдыг олон нийтэд муугаар харуулахын сацуу өдөөн хатгалгаа ОХУ-ын явуулга гэж зарлаж тун болзошгүй ажээ.

 Энэ мэдэгдлийн талаар Киев, Москвагаас ямар нэг тайлбар хийгээгүй байна.