П.АМГАЛАНБАЯР

“Хөтөлийн цемент шохой” ХХК-ийн хувьчлалын тухай тус компанийн гүйцэтгэх захирал эдийн засагч Л.Наранбаатар мэдээлэл өглөө. Тэрбээр “Төр өнчин хүүхдийн өвийг хурааж аваагүй, санхүүгийн  луйврын схемээр дээрэмдүүлсэн үйлдвэрээ эргүүлэн авч байна. Энэ үйлдвэрлэлийн хувьчлал бол хувьчлал бус дээрэм байсан. Хөтөлийн цемент шохойн үйлдвэр бол 1983 онд төрийн хөрөнгөөр, ахмад үеийнхэн маань бүтээн босгосон  Монгол Улсын цементийн ууган үйлдвэр юм” гэлээ. Мөн тус асуудалтай холбоотой хэд хэдэн баримтыг дэлгэлээ. Тодруулбал, Зам тээвэр, барилга, хот байгуулалтын сайд Х.Баттулга, ТӨХ-ны дарга  Д.Сугар нарын хамтарсан тушаалаар Хөтөлийн цемент шохойн үйлдвэрт хөрөнгө оруулагчийг сонгох  ажлын хэсэг  байгуулжээ. Тус ажлын хэсэгт  Х.Баттулгын зөвлөх Ц.Ууганбаяр тэргүүтэй зургаан хүн багтсан байна. Харин Ц.Ууганбаяр нь Хөгжлийн банкинд 120 тэрбум төгрөгийн  өртэй “Нью Яармаг хаусинг прожект” компанийн захирал бөгөөд, цагдан хоригдож байгаа аж. Улмаар “Бейзмент” гэдэг тамга, гэрчилгээнээс  өөр өмч хөрөнгөгүй, өмнө нь үйл ажиллагаа явуулж байгаагүй  айлын орон сууцан дээр хаягтай компани Хөтөл цемент үйлдвэрийн хөрөнгө оруулагчаар сонгогдсон байна. Мөн “Бейзмент” ХХК нь өөрийнхөө хөрөнгөөр Хөтөлийн цемент шохойн үйлдвэрт  хөрөнгө оруулах гэрээ байгуулсан ч Ерөнхий сайд Н.Алтанхуягийн Засгийн газрын  үед тус компанид 61.2 сая ам.долларын зээл олгожээ.

Эх сурвалж: www.polit.mn