М.ХҮСЛЭН

Сүүлийн үед Иракийн байдал тогтворгүй байгаа учраас дахин 300 цэргийн албан хаагчийг тус улсад илгээхээр болсноо Пентагон болон Цагаан ордон мэдээлэв. Цэргүүд Америкийн Элчин сайдын яамны байгууламжуудын аюулгүй  байдлыг бэх­жүүлэх, Багдадын олон улсын нисэх буудлыг хамгаалахад туслах юм. Америкийн цэргийнхэн  шаардлага гарсан нөхцөлд Америкийн иргэд ба өмчийг  хамгаалах бөгөөд байлдааны ажиллагаанд оролцохоор зэвсэглэжээ.

Америкийн 200 орчим цэргийн албан хаагчдыг өнгөрсөн ням, даваа гаригт Иракт хүргэсэн байна. Тэдний мэдэлд нисгэгчгүй онгоцнууд мөн нисдэг тэрэгний  отряд байгаа гэнэ. Тус дайчид нисэх зурвасын хамгаалалт, бэхлэлтийг хийх юм.

Өнгөрсөн сарын 19-нд Цагаан ордонд болсон хэвлэлийн хурал дээр АНУ-ын төрийн тэргүүн Иракийн хэт даврагчдад цохилт өгөхөд бэлэн гэсэн юм. Америкийн цэргийн нэмэлт хүчнийг илгээж байгаа нь орон нутгийн аюулгүйн албаныхныг сургахад тус болох аж.

Өнгөрсөн сард “Ирак, Левантегийн исламын улс” зэвсэгт байгууллага Ирак болон Сирийн зарим нутгийг эзэлж авсан билээ. Тэд хэд хоногийн өмнө Исламын Халифатын вант улсыг байгуулснаа зарласан аж. Тэдний эсрэг тэмцэж буй Иракийн зэвсэгт хүчин АНУ-аас тусламж гуйсан билээ.