Б.ЖАРГАЛ

Өрх толгойлсон эхчүүдийг төрөөс дэмжих шаардлагатай байгаа талаар иргэн О.Нарантуяа хэвлэлийн хурал хийлээ. Тодруулбал, иргэн О.Нарантуяа “Би ардчилсан хувьсгалын үеэр ажилгүй болж өрх толгойлсон ээж болсон. Үүнээс хойш үр хүүхдийнхээ төлөө зүтгэж 20-иод жил гудамжинд дуулж бүжиглэж явлаа. Үүний үр дүнд өвчтэй охиноо босгож одоо хамт урлагт хөл тавьсан. Сүүлийн дөрвөн жил тоглолт хийж олсон орлогоороо байшинтай болсон. Нийгмийн хүнд үед олон хүүхэдтэйгээ ажилгүй үлдсэн эхчүүдэд төрөөс тодорхой бодлого явуулахыг хүлээж ирсэн ч дорвитой дэмжлэг одоог хүртэл алга. 1992 оноос дөрвөөс дээш хүүхэдтэй ээжүүдийг төрөөс ажилгүй болгож нөхөн олговор олгож тэтгэвэрт гаргаж байсан. Би улсад 16 жил ажилласан ч нөхөн олговор болон халамжид хамрагдаагүй. Тиймээс надтай адил нөхөн олговорт хамрагдаагүй эхчүүдийг судалж нөхөн олгохыг хүсэж байна. Түүнчлэн гадуур дуулахад цагдаагийн эсэргүүцэлтэй тулгардаг. Ард түмэндээ өөрийн дуу хоолойгоо чөлөөтэй хүргэмээр байна. Алдарт эх гэдэг нэрийг эхчүүд амиа дэнсэлж олж авсан юм. Тиймээс өрх толгойлсон алдарт эхчүүдээ дэмжиж хандив хүсэж байна” гэв.

Түүний зүгээс нийгмийн өөрчлөлтийн үед төрийн бодлого, дэмжлэгээс хоцорч үлдсэн өрх толгойлсон, амьдралын боломжгүй байгаа эхчүүдийг төрөөс дэмжихийг хүслээ.

Эх сурвалж: www.polit.mn