Д.Болор

Ерөнхий сайд Н.Алтанхуягийн сэтгүүлчидтэй ярилцах “Ерөнхий сайдын 30 минут” уулзалт өнөөдөр Төрийн ордонд боллоо. Энэ удаагийн уулзалтаар нийгэмд талцал авчирсан төрөөс төмөр замд баримтлах бодлогын талаар дэлгэрэнгүй ярьсан юм. Ялангуяа, Х.Баттулга гишүүн өөрт нь хүргүүлсэн ил захидалд хариу өгснөө дуулгаад “Надад Х.Баттулга гишүүнтэй хэрүүл хийгээд явах зав алга. Тэглээ гээд би гүтгүүлээд суухгүй. Зохих тайлбарыг нь өгчихсөн” гэсэн. Түүний хариу мэдэгдлийг бүрэн эхээр нь хүргэж байна.

1.  “Харилцаа холбооны салбарт ZTE, Huawei компаниудын  тоног төхөөрөмж, программ хангамжийг ашиглах” тухай шийдвэр   2009 оноос хэрэгжиж эхэлсэн. Энэ асуудлаар Үндэсний Аюулгүй Байдлын Зөвлөлөөс гаргасан зөвлөмжийн дагууажил нь хийгдэж дууссан болно.

2. Эрхэм гишүүн таныг 2008 оноос Зам, тээврийн сайдаар 4 жил ажиллахдаа УИХ-д өргөн мэдүүлж батлуулсан төмөр замын бодлогыг манай Засгийн газар огтхон ч зөрчөөгүй бөгөөд уул уурхайн бүтээгдэхүүн нь шууд гадагшаа гарах зарим боомтод нарийн царигтай төмөр зам тавих асуудлыг “Төмөр замын талаар төрөөс баримтлах бодлого”-ын дагуу УИХ-д өргөн мэдүүлээд байна.

3. “Банк оф Чайна”-гийн салбарыг Монголд байгуулах асуудал Засгийн газрын түвшинд огт яригдаагүй болно.

4.  “Үндсэн хуульд нийцүүлэн боловсруулсан “Газрын тухай багц хуулийн төсөлд газрыг гадаадын иргэн, аж ахуйн нэгжид өмчлүүлэхийг зөвшөөрсөн заалт тусгасан мэтээр мушгин гуйвуулж, олон нийтийн мэдээллийн хэрэгслээр иргэдийг төөрөгдүүлэх зохион байгуулалттай аян эхэлсэн тул энэхуулийн төслийг эргүүлэн татсан.

Шинэчлэлийн Засгийн газар Монгол Улсын үндэсний аюулгүй байдал, тусгаар тогтнолд хор хохирол учруулах ямар нэгэн шийдвэр гаргаагүй бөгөөд ийм шийдвэр хэзээ ч гаргахгүй гэдгийг хариуцлагатайгаар мэдэгдэж байна.