Б.БЯМБАЖАРГАЛ

“Даяар монгол”, “Хөх монгол” хөдөлгөөнөөс хэвлэлийн хурал хийж Орос, Украины дайны асуудалд болгоомжтой хандахыг уриаллаа. Тухайлбал, “Даяар Монгол” хөдөлгөөний тэргүүн Г.Бямбатулга “Төв талбайд хийсэн дайныг эсэргүүцсэн жагсаал болон АН-ын мэдэгдэл нь улсын байр суурийг илэрхийлэх учир үүнд хариуцлагагүй хандаж болохгүй. Эдгээр хариуцлагагүй үйлдлүүд нь Украин улсын талд байгаа мэт харагдуулж байна. Тэдний гаргасан буруу үйлдлийн горыг ард түмэн амсах учир талбайн жагсаалыг “Даяар Монгол” хөдөлгөөнийхөн очиж хүчээр зогсоосон. Бидний энэ үйлдэл нь ОХУ-г өмөөрсөн эсвэл аль нэг улсын талд байгаа үйлдэл биш. ОХУ-аас шатахуун, эрчим хүчний хамааралтай байгаа үед дайны асуудалд хайхрамжгүй хандаж болохгүй. Жагсагчид аль нэг улсын далбааг барьж жагсах нь зохимжгүй” гэв.

Түүнчлэн “Хөх монгол” бүлгэмийн тэргүүн Д.Гансүрэн “Сүхбаатарын талбайд Украин улсын далбааг барин жагссан нь үндэсний аюулгүй байдалд заналхийлсэн үйлдэл гэж үзэж байна. Энэ үйлдэл нь Монгол Улсын байр суурийг илэрхийлж буруу ойлголт төрүүлэх магадлалтай. Түүнчлэн эгзэгтэй үед санаатайгаар залуусыг өдөөн турхирсан үйлдлийг нэр бүхий хүмүүс гаргаж байна” гэв. Тэдний зүгээс дайны эгзэгтэй нөхцөл байдлын үед болчимгүй үйлдэл гаргаж, өдөөн хатгахгүй байхыг уриаллаа.

Эх сурвалж: www.polit.mn