Ч.ГАНТУЛГА

“Гал үндэстэн холбоо”-ноос өнөөдөр “Зуун дамжсан урвагчид” уриатай хэвлэлийн хурлыг хийлээ. Тэд Бээжингийн олимпийн үеэр Монгол Улсын ерөнхий сайд Л.Оюун-Эрдэнэ БНХАУ-ын дарга Ши Жиньпинтэй уулзахдаа хэлсэн үг нь эх орноо үл тоомсорлосон, том гүрний улыг долоосон увайгүй үйлдэл болсон тул Л.Оюун-Эрдэнэ огцрох ёстой гэсэн байр суурийг илэрхийлсэн юм. Холбооны тэргүүн Я.Хундаганай “Ерөнхий сайд Л.Оюун-Эрдэнэ Хятадын хөгжлийн хурдны галт тэргэнд суухад Монгол Улс бэлэн байна. БНХАУ бол алтаар ч солимгүй сайн хөрш юм гэж хэлсэн нь монголчуудаа басамжилж, дорд үзсэн хэрэг боллоо. Бид бол тусгаар тогтносон, бие даасан улс. Гэтэл төрийн өндөрлөг нь ийм зүйл ярьж зогсох нь зүйд нийцэхгүй үйлдэл боллоо. Түүний хэлсэн эдгээр үг Монгол Улсын тусгаар тогтнол, үндэсний аюулгүй байдалд туйлын харш үг. Хятад улсад дагаар орох санаагаа Ерөнхий сайд илэрхийлээ. Тиймээс энэ үг, үйлдлийнхээ төлөө Ерөнхий сайд огцрох ёстой” гэв. Н.Цэгмид “Л.Оюун-Эрдэнэ зөвхөн дээрх алдааг гаргасан юм биш. Үл мэдэх шингэнийг Хятад улсаас өндөр үнээр авч, ард иргэдээ туршилтын туулай болгосноос хойш цар тахал гаарсан. Мөн авлига, үнийн өсөлт, утаа гээд олон асуудалд хариуцлагагүй хандаж ирлээ. Тиймээс Л.Оюун-Эрдэнийг огцрохыг шаардаж байна. Хэрэв энэ тушаалд суусаар байвал нэг өглөө сэрэхэд тусгаар тогтнол маань алдагдаж, харийн боол болсон байж мэдэх нь. Монгол ард түмнийхээ төлөө бид энэхүү шаардлагыг тавьж байна.” гэсэн юм. “Гал үндэстэн холбоо”-ны гишүүд нэгэн цагт Ерөнхий сайдад итгэж дэмжиж байсан үе байсан гэдгээ хэлээд, харин сүүлийн үед ард иргэдийнхээ итгэлийг алдаж байгааг нь тэвчихийн аргагүй болж байна. Тиймээс Ерөнхий сайд Л.Оюун-Эрдэнийг огцруулах шаардлагаа төрийн өндөрлөгүүдэд хүргүүлнэ гэдгээ хэлж байв.

Эх сурвалж www.polit.mn