М.ХҮСЛЭН

Польшийн парламент Ерөнхий сайд Дональд Тускед итгэл үзүүлсэн байна. Тус улсын Төв банкны тэргүүн болон Гадаад хэргийн сайд, Сангийн сайд, Дотоод хэргийн сайд нарын аудио бичлэг цацагдсанаас болсон улс төрийн маргаанаас болж Ерөнхий сайд өөртөө итгэл үзүүлэх талаар парламентад санал оруулаад байсан билээ.

Дональд Тускийг 237 депутат дэмжсэн байна. Тускийн удирддаг эрх баригч “Иргэний бүтэц” нам болон түүний эвсэл болох Хөдөлмөрийн нам парламентын олонхи буюу 235 суудлыг эзэмшдэг аж.

Энэ сарын 14-нд Польшийн “Впрост” сонинд Гадаад хэргийн сайд Радослав Сикорский, Сангийн сайд асан Яцек Ростовский нарын дэлхийн улс төрийн талаархи ярилцсан аудио бичлэгийг нийтэлсэн байна. Түүнчлэн Төв банкны тэргүүн Марек Белки болон Бартоломей Сенкевичийн эрх баригч намын сонгуульд ялалт байгуулах асуудлыг хэлэлцсэн талаархи аудио бичлэгийг мөн дэлгэжээ. Дээрх эрхмүүдийн аудио бичлэг Польшид нэлээд шуугиан тариад байгаа аж.