М.ХҮСЛЭН

Украины сөргөлдөгч талууд түр гал зогсоохоор тохиролцсон боловч уржигдар Славянск хотын дэргэд Оросын талыг баримтлагч салан тусгаарлагчид “Ми-8” нисдэг тэргийг буудан унагаажээ. Нисдэг тэрэгт явж байсан Украины армийн есөн хүн амь үрэгдсэн байна. Карачун уулын дэргэд нисч явсан нисдэг тэргийг хөдөлгөөнт пуужингаар буудсан байна. “Ми-8”-д сууж явсан хүмүүс түр гал зогсоох гэрээний биелэлтийг ажиглах төхөөрөмжийг Славянскад хүргэж өгөөд буцаж явсан мэргэжилтнүүд байжээ. Нисдэг тэргийг буудаж унагасан салан тусгаар­лагчид ойрхон оршдог Былвасовка тосгонд нуугдаж амжсан байна.

Хэрэг явдлын дараа Украины Ерөнхийлөгч Петр Порошенко түр гал зогсоох тохиролцоог цуцалж магадгүйг сануулжээ. Армийн нисдэг тэргийг буудаж унагаан, цэргүүдийн амийг хөнөөсний хариуг авахыг тушаажээ.

Энэ сарын 20-нд П.Порошенко мөргөлдөөнийг зогсоох тухай энхийн төлөвлөгөөг хэрэгжүүлэхийн тулд долоо хоногийн хугацаатай гал зогсоох захирамж гаргасан билээ. Оросыг дэмжигч салан тусгаарлагчид Украины Төрийн тэргүүний гал зогсоох захирамжийг дэмжиж буйгаа илэрхийлж байсан аж. Гэвч өнгөрсөн мягмар гаригт “Донецкийн Бүгд Найрамдах улсын” салан тусгаарлагчдын лидер Александр Бородай гал зогсоохыг хүлээн зөвшөөрөхгүй, тулалдаанаа үргэлжлүүлнэ хэмээн мэдэгджээ.  

Сөргөлдөгч талууд түр гал зогсоохоор тохиролцсон ч сүүлийн хэд хоногт хэд хэдэн буудалцаан болжээ. Донецк мужид салан тусгаарлагчид хилийн пост руу буудсан хэмээн Киевийн албаныхан мэдэгдэв. Буудалцаанд хоёр хүн шархадсан гэнэ. Харин “Луганскийн ард улс”-ын төлөөлөгчид Приволье тосгонд Украины армийнхан их буугаар буудсан гэжээ.

Энэ сарын 24-нд АНУ-ын дэд Ерөнхийлөгч Жо Байден Украины Төрийн тэргүүн Петр Порошенкотой утсаар ярьж, нисдэг тэргэнд осолдож амиа алдсан хүмүүст эмгэнэл илэрхийлжээ. Түүнчлэн Жо Байден “Хилээр гадаадаас зэр зэвсэг болон зэвсэгт дайчдыг оруулахыг хориглох хэрэгтэй” гэдгийг нэмж хэлсэн байна. Европын холбооноос Украины хямралыг намжаахад ОХУ-ыг хамтран ажиллахгүй бол эдийн засгийн хориг арга хэмжээ авна хэмээн сүрдүүлж буй юм. Харин ОХУ-ын Ерөнхийлөгч Владимир Путин Украины сөргөлдөгч талуудыг бие даасан яриа, хэлэлцээр хийхийг ятгаж байгаа аж.