М.ХҮСЛЭН

Израилийн Ерөнхий сайд Беньямин Нетаньяху АНУ-д хандан Иракийн байдлыг тогтворжуулахын тулд Ирантай хамтарч ажиллахгүй байхыг уриалсан байна. Энэ сарын 22-нд NBC телевизд өгсөн ярилцлагадаа Нетаньяху “АНУ Иракийн нэлээд олон хотыг эзэлж Багдад руу чиглэж яваа “Ирак, Левантегийн исламын улс” зэвсэгт бүлэглэлийн дайчдыг “шууд устгах” ёстой” гэжээ.

Саяхан АНУ-ын Ерөнхийлөгч Барак Обама “Хэрэв Иран АНУ-ын Ирак дахь бүх талын тэгш эрхийг хангах бодлогыг дэмжсэн тохиолдолд Тегерантай хамтарч ажиллаж болно” гэж мэдэгдсэн билээ.

Беньямин Нетаньяху түүнчлэн өнгөрсөн оны арваннэгдүгээр сард АНУ болон зургаан улсын Ираны цөмийн хөтөлбөрийг сааруулах тухай түр хэлэлцээр хийснийг “түүхэн алдаа” гэж нэрлэсэн байна. 

Израилийн бөмбөгдөгч онгоцнууд өчигдөр өглөө Сирийн нутаг дэвсгэрт агаараас цохилт өгчээ. Энэ нь өнгөрсөн ням гаригт Голаны өндөрлөгт Израилийн ус зөөвөрлөж явсан автомашин руу Сирийн арми гал нээж, хоёр хүнийг шархтуулан, 14 настай хүүгийн амийг хөнөөсөн хэргийн хариу үйлдэл аж. Израиль улс Сирид гурван жил гарангийн хугацаанд үргэлжилж буй иргэний дайныг хөршийн хувьд анхааралтай ажигласаар ирсэн юм. Израиль нь 1967 онд өрнөсөн Ойрхи Дорнодын дайнаар Голаны өндөрлөгийг Сири улсаас булаан авсан бөгөөд үүнийг олон улс хүлээн зөвшөөрдөггүй юм.