М.ТИЛЕК

Энэ сарын 20-22-нд ОХУ-ын бүрэлдэхүүнд багтдаг Саха Якутад чөлөөт бөхийн эрэгтэйчүүдийн 2014 оны Оросын аварга шалгаруулах тэмцээн болж өндөрлөв.  Эрэгтэй чөлөөт бөхөөр дэлхийд тэргүүлдэг хойд хөршийн шилдгүүд цугласан тэмцээнд 61 кг-ын жинд Буриадын Александр Богомоев түрүүлж аваргын алтан медалийг хүртжээ. Хагас шигшээд өнгөрсөн оны дэлхийн аварга Бекхан Гойгереевийг 11:1-ээр будаа болгож, финальд Якутын Егор Пономаревыг 4:1-ээр ялсан аж. А.Богомоевын ярилцлагыг хүргэж байна.

-Энэ бол ОХУ-ын аварга шалгаруулах тэмцээнээс хүртэж байгаа миний анхны түрүү. Тав дахь удаагаа зодоглож буй улсын аваргаас алт авсандаа баярлаж байна. Энд “Триумф” ордонд Дмит­рий Коркины нэрэмжит тэмцээнд түрүүлж байв. “Триумф” ордон надад их ээлтэй юм.

-Дэлхийн аварга Бек­хан Гойгереевийг ялсан нь урам өгсөн үү?

-Тиймээ. Тэр их туршлагатай бөх. Тэрхүү ялалт надад их урам өгсөн.

-Гойгереевийг амархан ялж байгаа юм шиг харагд­сан?

-Үнэндээ бүх барил­даан хүнд байсан. Бек­хан мэхний олон хувил­бартай. Би түүнээс арван оноогоор илүү байсан ч бол­гоомжилж байв. Тэр их хурц, дайчин барилддаг.

-Аль барилдаан хам­гийн хүнд байв?

-Финалын барилдаан. Сэтгэл хөдлөөд шатах гээд байсан. Пономаревтай хүндхэн барилдаан хийсэн. Өмнө нь түүнтэй барилдаж байсан эсэ­хээ санахгүй юм. Гэх­дээ тэрээр финалын барил­даанд маш сайн бэлтгэлтэй гарч ирсэн байна лээ.

-Дэлхийн аварга хүртэл гурван сарын хугацаа байна. Наана нь өөр тэмцээн болох уу?

-Мэдэхгүй, дасгал­жуу­лаг­чид л шийдэх байх. Одоохондоо юу ч хэлж чадахгүй.

-Дэлхийн аваргад явна гэдгээ баталж чадсан уу. Эсвэл жингийнхээ лидерүүдээс илүү гэдгээ дахин нотлох хэрэгтэй болов уу?

-Тэр талаар бас хэлж чадахгүй. Би Узбекистанд болох дэлхийн аварга шалгаруулах тэмцээнд явахыг их хүсч байна. Намайг авч явах байх гэж бодож байна.

-Чиний найз Опан Сат жин өгссөн байна?

-Түүнийг 65 кг-д зо­дог­лох болсныг би эрт мэдсэн. Сүүлийн үед тэ­рээр гэмтэл бэртлээс салаагүй.

-Жилийн өмнө чамайг финалд гарахаас өмнө Бесик Кудухов зогсоож байсан?

-Түүнийг бурхан ивээг. Бесик байхгүй болсон нь харамсалтай. Өнгөрсөн жилийн улсын аваргад би түүнд ялагдсан. Гэвч би тэр тэмцээнд түүнтэй барилдсанд баярлаж явдаг.