Н.Лхагвабаяр

УИХ-ын Инноваци, цахим бодлогын байнгын хорооны гишүүд болох Н.Учрал, Т.Доржханд, Б.Саранчимэг, П.Анужин нар өнөөдөр Дата төвд ажиллалаа. Энэ үеэр УИХ-ын гишүүн Н.Учрал байр сууриа илэрхийллээ.

- Үндэсний дата төвд ажиллалаа. Энэ үеэр ямар асуудал яригдав?

-Манай улс төрийн үйлчилгээг цахимжуулах томоохон зорилтыг тавиад цахим засаглалыг хэрэгжүүлэх “E-Mongolia” платформыг үйл ажиллагаанд нэвтрүүлээд байна.  Үүнийг технологийн хувьд харахаасаа илүү хууль эрх зүйн хувьд өөрчлөх зайлшгүй шаардлага байдаг. Цааснаас цахим руу бүрэн шилжихийн тулд эрх зүйн орчиндоо өөрчлөлт хийх ёстой. Энэ утгаараа Нийтийн мэдээллийн тухай хууль буюу цахим засаглалын хууль төрийн байгууллагууд мэдээллээ хэрхэн солилцох, төрийн мэдээллүүдийг дотор нь хэрхэн ангилахыг зохицуулж өгөхөөр нийтийн мэдээллийн хуулийг Засгийн газраас УИХ-д өргөн мэдүүлсэн. Мөн хувь хүний мэдээлэл хамгаалах буюу Хувь хүний нууцын хуулийн шинэчилсэн найруулгыг Засгийн газар өргөн мэдүүлж байна. Үүний цаана хувь хүний өөрийн мэдээ мэдээлэл хэрхэн хамгаалагдах вэ гэх асуудал зайлшгүй яригдана. Төр цахимжуулалт хийгээд цахим шилжилт хийхийн цаана иргэдийн мэдээллийг хэрхэн хамгаалах вэ гэсэн асуудал яригдах юм.  Үүнийг бид мэдээллийн аюулгүй байдлын хууль буюу Кибер  аюулгүй байдлын хуулийн шинэчилсэн найруулгад тусгаж өгч байна. Өнгөрсөн хугацаанд бид хадгалах, хамгаалах чиг үүргийг нэг байгууллага хэрэгжүүлж ирсэн нь зохистой байсангүй. Тэгэхээр мэдээллийг хадгалах чиг үүрэг тусдаа хамгаалах чиг үүрэг нь тусдаа байх ёстой.

-Тоон болон цахим гарын үсгийн хууль хэрэгжиж эхэлж байна.  Хуулийн хэрэгжилт ямар шатанд яваа бол?

-Тоон гарын үсгийг бид өнгөрсөн хугацаанд хэрэгжүүлж гурван компани тоон гарын үсгийн үйлчилгээг үзүүлж нийтдээ 35 мянга гаруй тоон гарын үсгийн хэрэгжүүлсэн нь чамлалттай тоо. Энэ тоог өндөр түвшинд хүргэх иргэдээ тоон гарын үсэгтэй болгох ажлыг хийж чадвал төр өөрөө хүнд сурталгүй, хурдан шуурхай үйлчилгээг ил тод хүргэдэг болно. Тийм учраас Цахим гарын үсгийн хууль,  Нийтийн мэдээллийн хууль, Хувь хүний мэдээлэл хамгаалах тухай хууль, Кибер аюулгүй байдлын хууль гэсэн дөрвөн хуулийг анхны хэлэлцүүлэгт бэлтгэх ажлын хэсгийг байгуулсан. Намрын чуулганаар энэ дөрвөн хууль батлагдана.
 

-Эдгээр дөрвөн хууль батлагдсанаар ямар үр дүн гарах юм бэ?

-Төр цахим шилжилтээ бүрэн хийж, иргэд төрийнхөө үйлчилгээг хурдан шуурхай, ил тод, нээлттэй авах. Үүний тулд авилгагүй, хүнд сурталгүй төр бий болгох үүнээс шалтгаалан улс эх орны аз жаргалын индекс, эх орондоо стрессгүй, бухимдалгүй амьдрах нөхцөл боломж бүрддэг. Тэгэхээр бид энэ хуулиудыг баталж чадсанаараа аюулгүй, тайван орчинд амьдрахаас гадна улс орны дижитал өрсөлдөх чадварын индекс өснө. Мөн энэ шаардлагуудыг биелүүлснээрээ манай улс гадаадын хөрөнгө оруулалтыг татах, эдийн засгаа төрөлжүүлэх сайн эхлэл тавигдах юм. Мөн Эдийн засгийн байнгын хорооноос Виртуал хөрөнгө оруулалтын хуулийн ажлын хэсгийг байгуулсан. Энэ хуулийн ажлын хэсгийг би бас ахалж байна. Виртуал хөрөнгө оруулалт буюу Дижитал хөрөнгө оруулалтыг нэмэгдүүлэх эрх зүйн орчноо бид боловсронгуй болгох, хуультай болох шаардлагатай байна. Эдгээр хуулиуд нь эдийн засагт эерэг таатай эффектийг өгөх, нөхцлийг бүрдүүлэх юм.

Эх сурвалж:www.polit.mn