Фото:Мелания Трамп. /Ройтерс/

АНУ-ын тэргүүн хатагтай Меланиа Трамп ОХУ-ын Ерөнхийлөгч Владимир Путинд илгээсэн захидалдаа хүүхдүүдийг хамгаалахыг хүссэн гэж Fox News Digital өчигдөр мэдээлсэн байна.

АНУ, ОХУ-ын Ерөнхийлөгч нар уулзах үеэр Дональд Трамп оросын төрийн тэргүүнд Меланиа Трампын захидлыг гардуулсан нь уулзалтын дараа тодорхой болсон юм.  

Тэргүүн хатагтай  хүүхэд насны хайр, аюулгүй байдал, боломж, мөрөөдлийн тухай сэтгэл хөдлөмөөр дүрсэлж, Путиныг эцэг эхийн хувьд ч, төрийн удирдагчийн хувьд ч "хойч үеийнхээ төлөө санаа тавихыг" уриалсан байна. “Эцэг эхчүүд бид хойч үедээ анхаарал халамж тавих үүрэгтэй. Удирдагчдын хувьд хүүхдүүдийн тав тухыг бий болгож, тэдэнд урам зориг өгөх нь бидний үүрэг юм. Сүнс бүр амар амгалан сэрж, ирээдүйг төгс хамгаалж байхын тулд бид нэр төрөөр дүүрэн ертөнцийг бий болгохын төлөө хичээх ёстой нь эргэлзээгүй” гэсэн байна. 

"Эдгээр хүүхдүүдийн гэм зэмгүй байдлыг хамгаалснаар та Орост үйлчлэхээс илүүтэйгээр хүн төрөлхтөнд үйлчлэх болно. Ийм зоримог санаа нь хүн төрөлхтний бүх хуваагдлыг давж гарсан бөгөөд ноён Путин танд энэ алсын харааг өнөөдөр үзэгнийхээ үзүүрээр хэрэгжүүлэх хүч бий. Үйлдэл хийх цаг нь болсон” гэж тэргүүн хатагтай бичжээ.

Захидлын хуулбарыг Fox News Digital телевиз анх олж дэлгэсэн ба дараа нь АНУ-ын ерөнхийлөгчийг дэмжигчид, тэр дундаа Ерөнхий прокурор Пам Бонди тэргүүтэй хүмүүс олон нийтийн сүлжээнд нийтэлсэн байна.

Хэдийгээр тэргүүн хатагтайн захидалд  Украйны нэрийг тусгайлан дурдаагүй ч, тус улсаас оросуудын хүчээр авч явсан хүүхдүүдийн асуудлыг хөндсөн байж болох агуулгыг илэрхийлж байна гэж Ройтерт, Ассошиэйтед Пресс зэрэг олон хэвлэлийн мэдээнд тэмдэглэжээ.

Ассошиэйтед Пресс агентлаг 2022 онд Украины хүүхдүүдийг орос руу авч явсан тухай бичсэн бөгөөд үүний дараа Олон улсын эрүүгийн шүүхээс ОХУ-ын Ерөнхийлөгч В.Путиныг дайны гэмт хэрэг үйлдсэн хэргээр баривчлах шийдвэр гаргаснаа зарласан. Харин Киевийн жагсаалтад орсон хулгайлагдсан гэх зуу гаруй хүүхэд Германаас олдсон гэж Оросын ГХЯ-ны албан ёсны төлөөлөгч мэдэгдэл гаргасан байсан. Тэдний олонх нь мөргөлдөөний эхэн үед Украйныг орхин явсан эцэг эх, асран хамгаалагчийн хамт Германд амьдардаг гээд  Европын орнууд өөрсдийн нутаг дэвсгэр дээр алга болсон Украины хүүхдүүдийн тоог ч мэдэхгүй байна гэж шүүмжилснийг оросын хэвлэлүүд мэдээлж байсан билээ.

Эх сурвалж: polit.mn