Т.САЙХАН

АНУ-ын ерөнхийлөгч Дональд Трамп, ОХУ-ын ерөнхийлөгч Владимир Путин нар баасан гарагт Аляскад хийсэн дээд хэмжээний уулзалтаараа Украины дайны талаар ямар нэгэн тохиролцоонд хүрч чадаагүй гэдгийг эх сурвалжууд мэдээллээ. Гурван цаг орчим үргэлжилсэн уулзалтын дараа  хоёр удирдагч зарим асуудлаар ахиц гарсан гэж хэлсэн ч дэлгэрэнгүй мэдээлэл өгөөгүй, асуултад хариулаагүй юм.

“Бид маш олон асуудлаар санал нэгдсэн. Гэхдээ зарим чухал асуудал дээр бүрэн тохиролцоонд хүрээгүй ч тодорхой ахицтай байна ” гэж Трамп онцлон тэмдэглэв.

Путины хувьд зөвхөн Украины асуудалд бус, АНУ-ОХУ-ын харилцааг сэргээх шинэ эхлэл болно гэж мэдэгдсэн юм. Гэсэн ч Путин Москвагийн олон жилийн байр сууриа давтаж, “дайнд хүргэсэн уг шалтгаануудыг арилгахгүй бол урт хугацааны энх тайван тогтохгүй” гэж мэдэгдсэн нь гал зогсоохтой үл нийцэж буйг харууллаа.

Хэлэлцээний үеэр ч Украинд байлдаан үргэлжилж, зүүн бүсийн ихэнх нутгуудад агаарын довтолгооны сэрэмжлүүлэг дуугарсан байна. Харин Оросын Ростов, Брянск мужийн захиргаад Украины дроны халдлагад өртсөн талаар мэдээлжээ.

Энэ уулзалтад АНУ-аас Төрийн нарийн бичгийн дарга Марко Рубио, Трампын ОХУ-ын асуудал эрхэлсэн тусгай төлөөлөгч Стив Виткофф оролцсон бол Оросоос Гадаад хэргийн сайд Сергей Лавров, гадаад бодлогын зөвлөх Юрий Ушаков нар оролцжээ.

Зеленский энэ уулзалтад уригдаагүй бөгөөд өмнө нь “Орос дайнаа үргэлжлүүлсээр байгаа ч шударга энхийн замыг нээх ёстой. Үүний тулд шаардлагатай алхмыг Орос хийх хэрэгтэй. Бид Америкт найдаж байна” гэж мэдэгдсэн юм.

Эх сурвалж:www.polit.mn