М.ГАН

Ардчилсан намын бүлгийн ээлжит хуралдааны дараа бүлгийн удирдлагууд мэдээлэл хийлээ. Бүлгийн дарга Д.Эрдэнэбат мэдээллийн эхэнд “Өглөө бүр сануулж бай” гэдэг шиг АН-ын бүлэг хуралдаан бүртээ нийгэмд тавигдаж буй шаардлага, эдийн засгаа идэвхжүүлэх ажлын талаар байнга, нухацтай ярилцаж байгааг онцоллоо. Тэрээр цаг үеийн зарим асуудлаар хэвлэлийнхний асуултад ийм хариулт өглөө.

-Үйлдвэр, хөдөө аж ахуйн сайдад Ш.Түвдэндоржийг томилох асуудалд намын бүлгийн  байр суурь хэвээр үү?

-Үйлдвэр, хөдөө аж ахуйн сайдын суудалд Ардчилсан намын байр суурь хэвээрээ байгаа. Энэ долоо хоногт УИХ-аар асуудлыг хэлэлцээд явна.

-Н.Батбаяр сайдыг огцруулах асуудалд танай намын бүлэг ямар байр суурьтай байгаа вэ?

- УИХ дахь Ардчилсан намын байр суурь өөрчлөгдөөгүй.  Энэ асуудлыг маргаашнаас (өнөөдөр) байнгын хороогоор хэлэлцэнэ.

-Сонгуулийн хуулийн ажлын хэсгийг идэвхжүүлж байгаа гэсэн. АН-ын бүлэг ямар, ямар асуудал дээр тогтож ярих вэ?

-Өнгөрсөн хугацаанд улс төрийн бүх намтай Сонгуулийн тухай хуулийг нэлээд өргөн хүрээнд, нээлттэй ярилцсан. Иймд одоо Сонгуулийн тухай хуулийн Ажлын хэсгийг нэлээд идэвхжүүлж, энэ хуулиа нэг тийш болгоё гэдэг дээр бүлгийн гишүүд санал нэгдсэн. Ажлын хэсэг энэ долоо хоногоос идэвхтэй ажиллаж эхлэх байх. Энэ хуулийн талаар АН-ын бүлгийн баримталж буй бодлого өнөөдрийг хүртэл яг хэвээрээ байгаа. Бид холимог системээ цаашид хадгалж явах нь зүйтэй гэсэн байр суурь дээр байгаа. Пропорциональ нь 50 хувь, мажоритар нь 50 хувь байх ёстой гэсэн зарчмын байр сууриа Ардчилсан нам хэдийнэ илэрхийлсэн.

-Улс төрийн намын тухай хуульд нэмэлт, өөрчлөлт оруулах Ажлын хэсгийг УИХ-ын гишүүн С.Баярцогт ахалдаг. Ажлын явц ямар байгаа вэ?

-Намын тухай хуульд ганц зүйл дээр тохиролцохгүй байна. Тухайлбал, намын өмчийн асуудал нэлээд маргаан дагуулж байгаа. Гишүүнчлэлтэй байх, байхгүй тухай асуудал ч мөн маргаантай байгаа. Тийм учраас маргаантай байгаа асуудлыг УИХ-д татаж оруулах нь ямар байх бол гэсэн эргэлзээ бий. Эдгээр асуудлыг нэг тийш нь болгож чадвал УИХ-аар хэлэлцэнэ.