Д.Гэрэл

Засгийн газрын ээлжит хуралдаанаар Экспортыг дэмжих хөтөлбөрийн хүрээнд төслүүдийг санхүүжүүлэх асуудлыг хэлэлцжээ.  Экспортыг дэмжих хөтөлбөрийн хүрээнд төслүүдийг санхүүжүүлэх асуудлыг Засгийн газрын хуралдаанаар хэлэлцээд хоёр тэрбум төгрөгөөс илүүгүй санхүүжилт хүссэн төслүүдийн санхүүжилтийг нь шийджээ. Тодруулбал, Жижиг, дунд үйлдвэрийг хөгжүүлэх сангаар дамжуулан олгоход шаардагдах 100 тэрбум хүртэл төгрөгийг Засгийн газрын үнэт цаасыг арилжаалж бүрдүүлсэн хөрөнгөөс олгохыг Эдийн засгийн хөгжлийн сайд Н.Батбаярт даалгажээ. Засгийн газрын мөрийн хөтөлбөрт тусгагдсан экспортыг нэмэгдүүлэх, импортыг орлох төслүүдийг сонгох шалгаруулах ажлын хүрээнд иргэд, аж ахуйн нэгжээс экспортыг дэмжих, нэмэгдүүлэх 131, импортыг орлох 757 бусад 200 төсөл ирүүлжээ.  Экспортыг дэмжих төслүүдийн 61 хувь малын түүхий эд боловсруулах, хүнсний бүтээгдэхүүний үйлдвэрлэлийн чиглэлийн төслүүд байгаа бол импортыг орлох төслүүдийн 30 хувь барилгын материалын үйлдвэрлэл, 26 хувь нь хүнсний бүтээгдэхүүний үйлдвэрлэлийн төсөл байна. Нийт төслүүдийн хүрээнд хоёр тэрбум ба түүнээс доош төгрөгийн зээл хүссэн 579 төсөл байгаа бөгөөд хүссэн санхүүжилтийн хэмжээ нь 341 тэрбум төгрөг байна.