Ч.Зотол

АН-ынхан  Х.Баттулгын оронд салбарын сайдаар хэнийг тавих вэ гэдгээ ярилцаж байна. Хэсэг, бүлгээр яриад зогсохгүй  фракциуд хоорондоо тохиролцож байгаа сурагтай.

Эхний ээлжинд зарчмын хоёр асуудлаар байр сууриа нэгтгэсэн гэнэ. АН-ынхан нэгдүгээрт,  МоАХ дотроос тавьчих олигтой хүн алга байгааг хүлээн зөвшөөрчээ. Хоёрдугаарт, өмнөх сайд нь давхар дээлээ тайлна гээд зүтгээд ажлаа өгсөн  учраас дараагийн хүнийг парламентын гаднаас  дан дээлтэй  эрхмийг оруулж ирэх талаар санал солилцсон байна. Гэтэл парламентын гаднаас  оруулж ирэхээр   дарга дагаж далдаганаж байгаад албан тушаалд хүрчихдэг, очсон хойноо ажлаа мэдэхгүй  салбараа унагаадаг  нөхдүүд  их төлөв  байдгийг гишүүд тал талаас  ярьж, шүүмжлэлтэй  зүйлүүд хэлжээ. 

Мөн АН олуулаа уриатай 2012 оны сонгуульд орж, олуулаа болсноор засгаа байгуулан шинэчлэлийн бодлого хэрэгжүүлж байгаа энэ үед болж өгвөл Засгийн газраа одоогийн бүтцээр нь ажилуулах, огцруулах энэ тэр гэсэн яриа шүүмжлэлийг аль болох хойш тавих, тэр хэрээр хүчтэй бас чадамжтай байлгах хэрэгтэй гэсэн санал ихээхэн гарч байгааг эх сурвалжууд ярьж байна. Ингээд Үйлдвэр, хөдөө аж ахуйн салбар бол маш том  асуудлуудыг хариуцдаг. Тэр ч үүднээсээ ажлаа мэдэх, мэдээлэлд ойр байх, цаашид салбарыг аваад явчих даацтай  хүн байх  ёстой гэж үзжээ. Энэ бүхний  эцэст  УИХ-ын гишүүд бас ч гэж  хал үзэж, халуун чулуу долоосон  нөхдүүд байдаг, тиймээс ер нь УИХ-ын гишүүд дотроос хэрэгжиж байгаа бодлогын асуудлууд, одоо ярьж буй асуудал, хэлэлцэгдэж байгаа хуулиудаа мэдэх нэгнийг  сайд болгох талаар  АН-ын гишүүд ам нэгдсэн сураг сонсогдлоо. Тэгэхээр дараагийн сайд дан биш давхар дээлтэй байж таарах нь ээ.