Д.БОЛД

Иргэн, төр засаг гэх хоёр зүйл хэзээнээс эсрэг тэсрэг үнэлгээ, үзэл бодолтой байдаг нь олон улсад тодорхой болсон зүйлүүдийн нэг болов уу. Хэдийгээр ардчилсан сонгуулиар төрийн эрх баригчдаа сонгодог улсын нэг нь Монгол мөн боловч томчууд борчуудынхаа  төлөө ажиллана гэдэг итгэл иргэдэд хэзээнээс төрөхөө болиод удаж буй юм. Ард түмэн сонголт­доо хэр их итгэл үзүүлж байгааг гаргадаг судалгааг  нэлээд олон газар хийдэг. Үүний  нэг нь “New Era” төв. Тэд саяхан ээлжит судалгаагаа хийжээ. Тэд энэ оны эхний улирлын нийгэм, улс төрийн судалгааг найман аймгийн 2200 иргэнээс санамсаргүй түүврийн аргаар авсан байна.

Энэхүү судалгааны дүнгээр бол нийгэм, эдийн засгийн хамгийн тулгамдсан асуудал нь бараа бүтээгдэхүүний  үний  өсөлт, авилга, хээл хахууль, орон сууцны үнийн өсөлт гэж  дараалуулан үзжээ. Мөн иргэд Оюутолгой, Тавантолгой төсөл, Чингис бонд, Үнэ тогтворжуулах хөтөлбөрийн үр дүн удахгүй гарна гэдэгт иттэж байгаагаа  дурдсан гэнэ. Энэхүү судалгаагаар одоогийн Засгийн газрын алдаа, амжилтыг нэрлүүлжээ. Амжилтаар нь “Гудамж” төсөл, иргэний бүртгэлийн шинэчлэл, түц машин, гэр хорооллын дахин төлөвлөлт зэрэг нийгэм, хувь хүнд чиглэсэн аж­луудыг нэрлэсэн  бол алдаа нь валютын хан­шийн, өргөн хэрэг­лээний бараа бүтээг­дэхүүний өсөлт гэжээ. Гэх­­дээ одоогийн Н.Алтанхуягийн Засгийн газ­рыг өмнөх Засгийн газ­руудаас хамгийн өндөр буюу 25.2 хувь нь сайн ажиллаж байгаа гэж дугуйлжээ.

Бүр их сонирхолтой дүгнэлтүүд цааш хөвөрнө. Намуудад хандах иргэдийн хандлагын тухайд 42.1 хувь нь АН, 24.5 хувь нь МАН, 11.2 хувь  нь  МАХН-ыг үлдсэн нь бусад намыг сонгосон  нь Монголд гуравдагч  хүчнээр МАХН  байгааг илтгэсэн хэрэг гэж  үзжээ. Харин хамгийн сонирхолтой судалгаа болох шилдэг  улстөрчдийн тухайд Ерөнхий сайд Н.Алтанхуяг 12.3 хувиар  тэргүүлж, Ц.Элбэгдорж, З.Энхболд нар удаалсан гэжээ. Ерөнхийлөгчийн сонгуульд МАН-аас өрсөлдсөн  Б.Бат-Эрдэнэ 7.1  хувьтайгаар  сөрөг хүчний намаас  бичигдэж хотын мээр Э.Бат-Үүлийн өмнө орж чаджээ.

“New Era” төвийн судалгааг тоймловол нэг иймэрхүү.

Эндээс нэг зүйл харагдана. Ер  нь аль ч Засгийн үед Ерөнхий  сайдын  эсрэг шүүмжлэл  болон рейтинг өндөр  гардаг нь  бараг жишиг  болж. Н.Алтанхуяг  үнэхээр шилдэг улстөрч мөн эсэхэд жаахан эргэлзээ  байж болно. Гэхдээ Н.Алтанхуягийн алдааны дэнсийг хэлэлцэхтэй зэрэгцэн иргэдийн амьдралд шууд бодитоор туссан байж  болох  нийгэмд  чиглэсэн ажлууд нь иргэдэд  таалагдаж гэдгийг энэхүү судалгаанаас  харж болохоор  байна.  Яалт  байхгүй олны  анхааралд байгаа хүнийг иргэд дугуйлахаас ч өөр аргагүй байж болох юм. Тэгээд ч энэхүү судалгааг 100 хувь бодит үнэн гэж  бодох  боломжгүй. Улс төр  агуулсан судалгаанууд араасаа бөөн хар дагуулдаг нь үнэн. Засгийн тэргүүнээ ард олон үнэхээр улстөрч юм гэж  үзэж байгаа ч АН-ын  болоод Н.Алтанхуягийн  нүүдлийн  буруу, зөвөөс  шалтгаалж 2016 оны сонгууль  нөгөө  тал руу хэвийх боломжит  цаг хугацаа байна.  Тиймээс энэхүү судалгааны  дүнд итгэж, тайвшралгүй ирээдүн замаа эмхтэйхэн эвхэхгүй бол монголчууд туйлшрамтгай  гэдгийг  мартаж болохгүй. Тэд нэг өглөө  сэрэхдээ  л  сонголтоо өөрчилж болдгийг үүрд санаж яваарай эрх  баригчид аа.