Э.Эрдэнэ БСШУСЯ, Монголын аутизмын холбоо, Гэрэлт Оюун хүүхдүүд ТББ хамтран “Ерөнхий боловсролын сургуульд аутизмтай хүүхдийг тэгш хамруулан сургах нь” сургалтыг зохион байгууллаа. Сургалтад Хан-Уул, Баянгол дүүргийн ЕБС-ийн сургалтын менежер, нийгмийн ажилтан, бага ангийн багш гэсэн 85 хүн хамрагджээ. БСШУС-ын сайдын тушаалаар “Хөгжлийн бэрхшээлтэй хүүхдийг Ерөнхий боловсролын сургуульд тэгш хамруулан сургах журам” батлагдсан. Ингэснээр хөгжлийн бэрхшээлтэй болон аутизмтай хүүхдүүд харьяа дүүргийн ЕБС-д суралцах боломж нээгдэж байгаа юм. ЕБС-ийн сургуулийн багш нарт аутизмтай хүүхэдтэй ажиллах арга зүйн сургалт явагддаггүй, багш нарт дээрх хүүхэдтэй ажиллах арга зүй дутмаг байдаг байна. Монголын Аутизмын холбоо, БСШУСЯ-ны бодлогын хэрэгжилтийг урт хугацаанд үр дүнтэй байлгах үүднээс багш нарыг сургах, шаардлагатай мэдлэг ойлголт, ур чадварыг олгох сургалтыг хамтран зохион байгуулж Улаанбаатар хотын 1000 багшийг хамруулахаар төлөвлөөд байна. Монголын аутизмын холбооны гүйцэтгэх захирал Л.Алтангэрэл “Аутизмтай хүүхдээ энгийн хүүхдүүдтэй хамт энгийн сургуульд суралцуулах олон эерэг нөлөөтэй. Тиймээс багш нарыг сургаж мэдээлэл, арга зүйгээр хангах зорилготой анхны сургалтаа зохион байгуулж байна. Цаашид дүүрэг бүрийн багш нарыг хамруулна. Мөн Канадын аутизмын холбооны зөвшөөрөлтэйгөөр олон улсын туршлагыг багш нартаа хуваалцах багш, эмч мэргэжилтнүүдэд зориулсан Аутизмын тухай гарын авлага номыг орчуулан сургалтын үеэр тарааж байгаа” гэсэн юм. Эх сурвалж: "Зууны мэдээ" сонин