УИХ-ын дарга З.Энхболд өчигдөр ХБНГУ-аас Монгол Улсад суугаа Онц бөгөөд Бүрэн эрхт Элчин сайд Г.Тийдеманныг хүлээн авч уулзжээ. Тэд өмнө нь уулзаж байсан бөгөөд энэ удаад спикерийн айлчлалын талаар хөндсөн байна. Мөн хоёр орны харилцаа, тэр дундаа парламент хоорондын хамтын ажиллагааны тухай ярилцжээ. Элчин сайд ноён Г.Тийдеманн өнгөрсөн хугацаанд УИХ-ын даргын ХБНГУ-д хийхээр төлөвлөсөн албан ёсны айлчлалыг зохион байгуулах талаар хийсэн ажлаа танилцуулсан байна.

УИХ-ын дарга өмнө нь АНУ, Канад, Туркт айлчилж байсан бөгөөд энэ сард Өмнөд Солонгост албан ёсны айлчлал хийгээд ирсэн. Түүний дараагийн айлчлал хийх орон Герман улс бөгөөд хэзээ явах нь тодорхой биш байна. 

Мөн Германы Элчин сайд тус улсын байгууллагууд эдийн засгийн чиглэлээр Монголын талтай өргөн хүрээгээр хамтран ажиллах нэлээд сонирхолтой байгааг онцолсон байна.  Ирэх зургадугаар сард Герман, Монголын эдийн засгийн чуулган зохиогдох гэж байгааг Элчин сайд дурджээ.