МАХН-ын ахмад гишүүд Б.Доржзовд, С.Хорлоо нар  өнөөдөр  намынхаа байранд хэвлэлийн хурал хийлгэлээ. Тэд нам дэд дарга  Д.Тэрбишдагва,  Ерөнхий нарийн бичгийн дарга Г.Шийлэгдамба нарыг огцруулах ямар ч үндэслэлгүй  гэж мэдэгдлээ.  

Тэгвэл МАХН-ын дэргэдэх  “МАХН-ын анхдагчдын холбоо”  гэх байгууллага  Ч.Азар нарын гишүүд Д.Тэрбишдагва, Г.Шийлэгдамба нарыг огцруулах ёстой хэмээн  байр сууриа илэрхийлж буй. Мөн  МАХН-ын одоогийн удирдлагууд нам дотор шударга бусыг бугшуулж байгаа хэмээн үзэж, хэрэв огцрохгүй бол өлсгөлөн зарлана хэмээн мэдэгдээд байгаа. Энэ тухайд өнөөдөр болсон хэвлэлийн хурал хариу өгөв.  МАХН-ын ахмад гишүүн С.Хорлоо “Бидний хэдэн гишүүд МАХН-ын анхдагчдын холбоог анх байгуулахдаа удирдлагуудынхаа болохгүй хэлж засч залруулж, болж байгааг дэмжиж зөвлөж туслах зорилготой байсан. Гэтэл Ч.Азар нарын хэдэн хүн өнөөдөр зорилгоосоо хазайж бусдын даалгавраар ажиллаж эхлээд байна. Тэд Г.Баярсайхан нарын хүмүүсийн даалгавраар нам дотор хагарал үүсгэх гэж яваа хүмүүс. Ч.Азарын хувьд сонгуулийн сурталчилгаанд оролцсон нэрийдлээр Ерөнхий нарийн бичгийн дарга Г.Шийлэгдамбаас мөнгө нэхэж байгаа. Үнэндээ өөрөө дур мэдэн штаб байгуулж АН-ынхантай нийлж эсрэг сурталчилгаа хийсэн учир мөнгө нэхэх шаардлагагүй. Тэгэхээр тэдний яриад байгаа Д.Тэрбишдагва, Г.Шийлэгдамба нарыг огцруулна гэдэг нь ямар ч үндэслэлгүй, өөрсдийнх нь зохиосон,  гаднын даалгаврын дагуу хийж байгаа үйлдэл”  гэв.

Харин МАХН-ын ахмад гишүүд Б.Доржзовд “Би энэ намыг нэрээ авахаас нь эхлээд хамт тэмцэж явсан хүн. МАХН-ын анхдагчдын холбоо гэж байдаг эсэх талаар юу ч мэдэхгүй. Миний хувьд анхнаас нь эхэлж явсан хүний хувьд ийм холбоо байгаа эсэхийг мэдэх л учиртай. Тухайн үед МАХН нэрээ сэргээж авах гэж тэмцэж явахад тэдний хэн ч байгаагүй” гэж мэдэгдлээ.

Ч.Зотол