М.ЦЭЦЭГ

Чуулганы завсарлагаа­наар хоёр сар орчим ажиллаж, амарч, аялж явсан эрхэм гишүүд ирэх долоо хоногоос саарал байшиндаа төвлөрөх төлөвтэй байна. Учир нь ирэх долоо хоногт Эдийн засгийн форум болно. Түүнд оролцоно. Мөн ирэх сарын эхэнд хаврын ээлжит чуулган эхэлнэ. Чуулган эхэллээ гэхэд хэлэлцэх асуудалгүй тул түүнээс өмнө байнгын хороодоо хуралдуулж хэлэлцэх асуудлаа батлах ажил гарна. Учир нь намрын чуулган нэгдүгээр сард завсарлахдаа хаврын ээлжит чуулганаар хэлэлцэх асуудлын дарааллыг батлах байсан ч хойшлуулсан юм. УИХ дахь сөрөг хүчин болон “Шударга ёс” эвслийн бүлгээс хаврын чуулганд хэлэлцүүлэхээр санал өгсөн хуулийн төслүүд нь багтаагүй учир хэлэлцэх асуудлын дараалал тогтоох тухай тогтоолыг унагасан. Тэгэхээр ирэх сарын 5-нд эхлэх хуулийн хугацаатай хаврын чуулган нээлтээ хийхээс өмнө Төрийн байгуулалтын байнгын хороо заавал хуралдаж дарааллаа батална. Гишүүдийг хөдөө, гадаанаас ирж ирц бүрдэхээр хуралдахаар төлөвлөж байгаа тухай тус байнгын хорооны дарга А.Бакей ярьжээ. Магадгүй ээлжит бус чуулган ч хуралдана гэсэн мэдээлэл бий. Гэхдээ ирэх долоо хоногт эдийн засгийн форумтай учир амжихгүй. Тиймээс хаврын чуулганаас амдаж дарааллаа тогтоох ажил эрхэм гишүүдэд байна. Хоёрхон долоо хоногийн дараа чуулган эхлэх гэж байхад гишүүд хэлэлцэх асуудал нь тодорхойгүй сууж байгаа юм.

Өмнө нь төлөвлөж байснаар бол өнгөрсөн оны төсвийн гүйцэтгэл, ирэх 2015 оны төсвийн хүрээний мэдэгдэл, 2013 оны эдийн засаг, нийгмийг хөгжлүүлэх Үндсэн чиглэлийн биелэлт,  2015 онд хөгжүүлэх Үндсэн чиглэл зэргийг хэлэлцэнэ. Энд дурдсан Үндсэн чиглэлийн биелэлт, төсвийн хүрээний мэдэг­дэл, төсвийн гүйцэтгэл зэргийг жил бүрийн хаврын чуулганаар заавал хэлэлцдэг юм.

Үүнээс гадна Газрын тухай хууль, Хамтын тэтгэврийн тухай хууль, Шилэн дансны тухай зэрэг олон нийтийн сонирхож буй хуулийн төслүүд багтсан байв. Мөн хууль, шүүхийн шинэчлэлийн нэлээд хэдэн төсөл орсон юм. Энд олон нийтийн анхааралд өнгөрсөн намраас байсаар ирсэн урт нэртэй хуулийг хэрэгжүүлэх журмын тухай хуулийг өөрчлөх төсөл багтсан байв. Энэ асуудал гишүүдийн ч анхааралд байна.