Д.ГЭРЭЛ

МАХН-ын удирдлагууд цаг үеийн асуудлаар мэдээлэл өглөө. МАХН-ын Ерөнхий нарийн бичгийн дарга Г.Шийлэгдамба, түүний зөвлөх З.Батбаяр, Нарийн бичгийн дарга П.Цогтбаатар, П.Ангараг нарын төлөөлөл оролцов. Тэд хурлын эхэнд 21 аймагт “Шударга ёсны аян”-ыг үргэлжлүүлэх болсноо дуулгав. МАХН-ынхан өнгөрсөн онуудад орон нутагт ажиллаж иргэдийн санаа бодлыг нь сонсч шийдвэр гаргахдаа тусгаж байсан юм. Тэд энэ жишгээ давтаж энэ сарын 20-ноос ирэх гуравдугаар сарыг хүртэл  орон нутагт ажиллахаар зэхжээ. Энэ талаар П.Ангараг “Шударга ёсны аянд манай эвслийн  УИХ-ын гишүүд, Засгийн газрын гишүүд болон  намын удирдлагууд, эмэгтэйчүүд, залуучуудын төлөөлөл 21 аймгийн иргэдийн санаа бодлыг сонсоно. Хамгийн гол нь УИХ-ын сонгуульд дэвшүүлсэн намын мөрийн хөтөлбөрийн хэрэгжилт, үр дүн ард иргэдэд хэрхэн тусав. Шинэчлэлийн Засгийн газрын мөрийн хөтөлбөрийн хэрэгжилтийг асууж сонирхоно” гэв. Үүний дараа Г.Шийлэгдамба дарга сэтгүүлчдийн асуултад хариулсан юм.

-МАХН-ын дарга Н.Энхбаяртай намын удирдлагууд нь очиж золгосон. Түүний биеийн байдал гайгүй биз дээ?

-Н.Энхбаяр даргын биеийн байдал сайжирч байгаа. Байнга эмчилгээ хийлгэж байна.

-Намын их чуулганаа хэзээ гэж товлов?

-Уг нь ирэх дөрөвдүгээр сард хийнэ гэж товлож байсан ч хойшлохоор болсон. Энэ нь орон нутагт ажиллаж иргэдийн санаа бодлыг сонсох их ажлаас үүдэлтэй. Дээрээс нь их чуулганы бэлтгэлийг сайтар базаах хэрэг бас байна.

-Их чуулганд Н.Энхбаяр дарга ирж оролцох уу?

-Оролцох байх. Даргад оролцох бодол бий. Мэдээж намын гишүүдийн зүгээс оролцуулах хүсэл сонирхол, хүлээлт байгаа.

-Эвслийн сайд нарыг Засгийн газраас гарах тухай мэдээлэл байна?

-Гарна гэж албан ёсоор огт яриагүй. Бид төр, засгийг тогтвортой ажиллах нь зүйтэй гэж үздэг. Байр сууриндаа хатуу зогсоно. Энэ зарчмаасаа буцахгүй болов уу.