М.ЦЭЦЭГ

Төрийн байгуулалтын байнгын хорооны хуралдаан өчигдөр болж ирэх хаврын ээлжит чуулганаар хэлэлцэх асуудлыг хэлэлцэв. Хаврын чуулганаар хэлэлцэх асуудлын талаар хууль санаачлагчдаас саналыг нь урьдчилан авч тогтоолын төслийг боловсруулсан байна. Нийт 279 санал ирүүлснээс Ерөнхийлөгч тав, Аюулгүй байдал, гадаад бодлогын байнгын хороо зургаа, Байгаль орчин, хүнс, хөдөө аж ахуйн байнгын хороо дөрөв, Нийгмийн бодлого, боловсрол, соёл, шинжлэх ухааны байнгын хороо 11, Төрийн байгуулалтын байнгын хороо гурав, Төсвийн байнгын хороо дөрөв, Эдийн засгийн байнгын хороо зургаа, Хууль зүйн байнгын хороо долоо, УИХ дахь Ардчилсан намын бүлэг 47, МАН-ын бүлэг 46, МАХН-МҮАН-ын “Шударга ёс” эвслийн бүлэг 35, Засгийн газар 95 төсөл, гишүүн С.Ганбаатар 10 санал ирүүлжээ.

Эндээс ирэх хаврын чуулганаар 18 асуудал хэлэлцэхээр төлөвлөв. Одоо намрын чуулганаар хэлэлцэж буй нэлээд хэдэн төсөл орсон байна. Тухайлбал, өнгөрсөн намар ээлжит бус чуулганаар хэлэлцэж эхлээд намрын чуулган дамжин хэлэлцэж, иргэний хөдөлгөө­нийхний нэлээд эсэргүүцэлтэй тулаад буй урт нэртэй хуулийг хэрэгжүүлэх журмын тухай хуулийн төслийг хэлэлцэхээр болжээ. Хэлэлцэх асуудлын дараалалтай холбогдуулан  гишүүн Ж.Батзандан “Хаврын ээлжит чуулганаар Гол, мөрний урсац бүрэлдэх эх, усны сан бүхий газрын хамгаалалтын бүс, ойн сан бүхий газарт ашигт малтмал хайх, ашиглахыг хориглох тухай хуулийг дагаж мөрдөх журмын тухай хуульд нэмэлт, өөрчлөлт оруулах тухай хуулийн төслийг хэлэлцэхээр тусгажээ. Иргэд, олон нийтийн анхааралд байгаа, зөрчил маргаантай энэ мэтийн асуудлыг хөндсөн хууль тогтоомжийг иргэний нийгмийн байгууллагууд, иргэдээр хэлэлцүүлж саналыг нь авч байж хэлэлцэж нь зүйтэй” гэсэн юм.

Мөн намрын чуулганаар ирэх оны төсвийн хүрээний мэдэгдэл, төсвийн төсөөлөл, үндсэн чиглэл,  өнгөрсөн оны үндсэн чиглэлийн биелэлтийг хэлэлцдэг юм.

Намрын чуулганаар хэлэлцэх асуудлын дараалал.

1/Монгол Улсын 2013 оны нэгдсэн төсвийн гүйцэтгэл батлах тухай Улсын Их Хурлын тогтоолын төсөл, Засгийн газрын 2013 оны санхүүгийн нэгдсэн тайлан

2/Монгол Улсын нэгдсэн төс­вийн 2015 оны төсвийн хүрээний мэдэгдэл, 2016-2017 оны төсвийн төсөөллийн тухай хуулийн төсөл

3/Монгол Улсын эдийн засаг, нийгмийг 2015 онд хөгжүүлэх Үндсэн чиглэл батлах тухай Улсын Их Хурлын тогтоолын төсөл

4/Монгол Улсын эдийн засаг, нийгмийг 2013 онд хөгжүүлэх Үндсэн чиглэлийн биелэлт

5/Хөгжлийн банкнаас санхүүжүүлэх төсөл, хөтөлбөрийн жагсаалт батлах тухай Улсын Их Хурлын тогтоолын төсөл

6/Газрын тухай хуулийн төсөл /шинэчилсэн найруулга/

7/Ногоон хөгжлийн үзэл баримтлал, дунд хугацааны хөтөлбөр батлах тухай Улсын Их Хурлын тогтоолын төсөл

8/Гол, мөрний урсац бүрэлдэх эх, усны сан бүхий газрын хамгаалалтын бүс, ойн сан бүхий газарт ашигт малтмал хайх, ашиглахыг хориглох тухай хуулийг дагаж мөрдөх журмын тухай хуульд нэмэлт, өөрчлөлт оруулах тухай хуулийн төсөл

9/Малын индексжүүлсэн даатгалын тухай хуулийн төсөл

10/Төрийн албаны тухай хуульд нэмэлт, өөрчлөлт оруулах тухай хуулийн төсөл

11/Хамтын тэтгэврийн тухай хуулийн төсөл

12/Мөрдөх албаны тухай хуулийн төсөл

13/Эрүүгийн байцаан шийтгэх хуульд өөрчлөлт оруулах тухай хуулийн төсөл

14/Хууль сахиулагчийн эрх зүйн байдлын тухай хуулийн төсөл

15/Галт зэвсгийн тухай хуулийн төсөл /шинэчилсэн найруулга/

16/Хуулийн этгээдийн улсын бүртгэлийн тухай хуулийн төсөл /шинэчилсэн найруулга/

17/Төрийн аж ахуйн үйл ажиллагааг хязгаарлах тухай хуулийн төсөл

18/Шилэн дансны тухай хуулийн төсөл

19/Бусад.