М.ЦЭЦЭГ

Шинэ оны албан ёсны ажлын өдөр өчигдрөөс эхэлсэн ч УИХ-ын гишүүд уламжлал ёсоор амрав. Аливаа баярын өмнө парламент идэвхтэй ажиллаж, баярын дараа амардаг уламжлалаа энэ жил ч хэвээр хадгалав. Эрхэм гишүүдийн хувьд идэвхтэй ажиллах ганц жил нь 2014 он. Сонгогдсоноосоо хойш шинэ гишүүд нь эхний жил зүгширч, хууччуул нь орон нутаг, Ерөнхийлөгчийн сонгууль гээд хувь, хувьсгалын ажилд нэлээд дайчлагдаад саяхан амсхийв. Аливаа парламентын хувьд хоёр дахь жилдээ зүгширч ажил төрөлдөө анхаардаг. Иймд Говь-Алтайн дахин сонгуулийг эс тооцвол гишүүдийн санаа сэтгэлийг хоёрдуулж, гуравдуулах элдэв зүйлийн сонгуульгүй жил 2014 он юм. Ирэх он сонгуулийн гарааны жил учир зав чөлөө тун бага бөгөөд 2016 онд ард түмнээс дүнгээ авах гэж хэрэндээ хичээн зүтгэж, төрсөн өссөн нутаг, тойрог дүүргээ бараадах болно. Тиймээс 2014 эрхэм түшээдийн ажлын ачаалалтай он жилүүд юм.

 Одоо үргэлжилж буй намрын ээлжит чуулган ирэх хоёрдугаар сарын 5-нд завсарлах хуулийн хугацаатай. Нэгэн ээлжит чуулганы хугацаа дуусахад ердөө дөрвөн долоо хоног үлджээ. Чуулганы хугацаанд амжиж батдах ёстой хуулийн төслүүд нэлээд бий. Тухайлбал, олон гишүүн сайдаар ажилладгийг болиулаар Төрийн тэргүүн хуулийн төсөл санаачилсан. Гишүүдийн давхар дээлийг тайлах хууль гэж тодорхой нэрлэж буй. Энэ хуулийг парламент ойрын үед батлана. Мөн Ерөнхийлөгч ч шахалт үзүүлсээр байгаа гэсэн. Харин хууль батлагдвал сайдаар ажилладаг 16 гишүүн /Ерөнхий сайдыг тооцохгүй/ ажлаа өгөх үү, эсвэл гишүүнийхээ бүрэн эрхээс татгалзах уу гэдгийг шийднэ. Гэвч ийм эрсдэл үүрэхгүйн тулд хуулийн үйлчлэх хугацааг дараагийн сонгуулиас мөрдөхөөр гишүүд тохирсон байгаа. Гэхдээ ингэж батлавал Төрийн тэргүүн хориг тавина гэдгээ зөвлөхөөрөө дамжуулан парламентад хатуу сануулсан юм.

Үүнээс гадна ээлжит бус чуулган зарлан хэлэлцэж эхэлсэн Алтны худалдаанд ил тод байдлыг бүрдүүлэх тухай хуулийн төсөл, мөн Авлигын эсрэг  хуулийн төсөлд нэмэлт, өөрчлөлт оруулах тухай хуулийн төсөл, Төрөөс эрдэс баялгийн салбарт баримтлах бодлогыг одоогоор хэлэлцэж буй. Мөн ойрын хугацаанд Говь-Алтай аймгийн ИТХ-ын дахин сонгуулийн тухай зардлыг батлах юм.

Мөн сүүлийн нэг сар парламент ирц муу байв. Өөрсдийн сул талаа ойлгож, хариуцлагатай ажилладаг шинэ механизм нэвтрүүлэхээр ярьж буй. Гишүүд хурууны хээгээр ажилдаа бүртгүүлж, хурууны хээгээр санал өгдөг байхаар нэр бүхий гишүүд УИХ-ын чуулганы хуралдааны дэгийн тухай хуульд өөрчлөлт оруулах төсөл санаачилсан. Энэ хуулийг намрын чуулганаар баталж, гишүүд хариуцлагатай ажиллах болов уу.