М.ЦЭЦЭГ

Парламент дахь Ардчилсан нам, МАХН-МҮАН-ын “Шударга ёс” эвсэл, бие даагчдын төлөөллөөс байнгын хорооны дарга нарыг сонгосон. УИХ-ын найман байнгын хорооны дарга нарын сонгуульт ажлын хугацаа энэ жил дуусгавар болж байгаа юм. УИХ-ын тухай хуулиар бол байнгын хорооны дарга нар нэг жилийн хугацаатай ажиллах ёстой.  Иймд байнгын хорооны дарга нарыг сонгох тухай өчигдөр хэлэлцлээ. Таван байнгын хороо хуралдаж дарга нараа өөрчлөх шаардлагагүй, улираан ажиллуулах нь зүйтэй гэж үзжээ.

Тухайлбал,  Төрийн байгуулалтын байнгын хорооны даргаар А.Бакей, Хууль зүйн байнгын хорооны даргаар Ш.Түвдэндорж, Эдийн засгийн байнгын хорооны даргаар Б.Гарамгайбаатар, Байгаль орчин, хүнс, хөдөө аж ахуйн байнгын хорооны даргаар Г.Баярсайхан,  Төсвийн байнгын хорооны даргаар Ц.Даваасүрэн нарыг улираан ажиллуулахаар болжээ. Харин Аюулгүй байдал, гадаад бодлогын байнгын хорооны даргаар Ц.Цолмон, Нийгмийн бодлого, боловсрол, соёл, шинжлэх ухааны байнгын хорооны даргаар З.Баянсэлэнгэ, Өргөдлийн байнгын хорооны даргаар Р.Бурмаа нар ажилладаг. Тэдний оронд шинэ дарга сонгох уу, улираах уу гэдгийг өнөөдөр байнгын хороод нь хуралдаж шийдэх аж.  Байнгын хорооны даргад шинээр нэр дэвших сонирхолтой гишүүдийн нэр тодорхой биш байна. Одоо ажиллаж байгаа дарга нарыг улираан нэр дэвшүүлэхээр тухайн нам, эвслийн бүлэг нь тохирсон гэнэ. Гэхдээ үлдсэн гурван байнгын хорооны даргад нэр дэвших сонирхолтой эрхэм ч байхыг үгүйсгэхгүй. 

Байнгын хорооны дарга нарыг сонгох асуудлыг энэ долоо хоногт багтаан шийдэх учиртай. Иймд УИХ-ын чуулганы өнөөдрийн нэгдсэн хуралдаанаар асуудлыг эцэслэн шийдэх бололтой.