Б.ДАМДИН

Ардчиллын партизануудын нэг, МСДН-ын генсек асан Л.Бямбажаргал өчигдөр фейсбүүк хуудаснаа “Таныг аль фракцад харьяалагддагийг тодруулж байж ажилд томилно гэдэг товч бөгөөд тодорхой хариулт авав. Надад бол чаддаг ажлаа хийх үү, үгүй юу гэдэг асуудал байсан юм. За, Элбэг, Хуягаа, Энхболд, Гончигдорж, Баабар, Женко гээд л фракц гээч юмнаас нь хайхаас...” гэж бичсэн нь шуугиан тариад авав. Тэрээр цааш нь “..Уг нь намайг томилчихоод фракцаараа дайрахыг харсан бол гоё байхгүй юу. Бямбажаргал бол Амаржаргал биш ш дээ...Миний очих гэж байсан ажил эрдэс баялагт эцсийн шинжилгээ хийе гэсэн чинь болохгүй, мөрөөрөө урсаж байг гээд байгаа юм байна...” гэсэн үгийг унагаад авна лээ.

Түүнд хандаж зарим нь “Ардчиллын тэргүүн эгнээнд явсан нөхдүүд улайх нүүртэй, ичих булчирхайтай учраас ажлаа хийгээд явж байна. Харин нам хэсч, янхан болсон хэдэн нөхөр АН-д жүжиг тоглосон шигээ намын нэр хүндийг гутаан, ажлаа ч олигтой хийж чадахгүй, албан тушаалын хойноос үхэн хатан гүйгээд байгаа юм шиг. Та ардчиллын түүхийг бичээч. Со гавьяат үнэн хэлсэн шүү. Намаа цэвэрлэх цаг болсон байна...”  гэсэн зөвлөгөөг өгч амжсан.

Лосолын Бямбажаргал нь Эрхүүгийн их сургуулийг онолын физикч, философич мэргэжлээр төгссөн. 1992-1999 онд МСДН-ын дэд дарга, Ерөнхий нарийн бичгийн дарга 1999-2000 онд  Эрүүл мэнд, нийгмийн хамгааллын сайдын зөвлөх, Сангийн сайдын зөвлөх, 2000-2008 онуудад Дээд Судалгааны хүрээлэнгийн эрдэмтэн нарийн бичгийн дарга. Өдгөө Монголын Цөм Цацрагийн нийгэмлэгийн ерөнхийлөгчөөр ажиллаж байгаа юм. Тэрээр Геологийн төв лабораторийн захирлын албан тушаалд очих гэж байсан боловч ийн “мултарчээ”. Улс төрийн зэрэг зиндааны хувьд одоогийн АН-д “эцэг” нь шахам лидерүүдийн нэг энэ эрхмийн үг, илэрхийлэл харин ч зөөлөн байгааг улс төрийн хүрээнийхэн ярьж байна. Ардчиллынхан бас нэг партизанаа гомдоолоо гэх яриа ч гарч эхэллээ.